Mawkyrwat, Rymphang 02
Ka KMC Sonapur FC ka la jam sha ka semi final ha ka lympung ïalehkai Mawlangwir Football Invitation Tournament 2023- 24, hadien ba ka la lah ban pynliem noh ïa ka Meghalaya Police F.T da 3-2 kol ha ka sngi Thohdieng ha Rowell Lyngdoh Stadium, Saitsnad kaba ha Mawlangwir, SWKHD.
Ha katei ka jingïalehkai, ka long shisha kaba itynnad bad pynhun ïa ki paidbah nongpeitkai namar ka jingïabiang bor na baroh ar tylli ki kynhun.
Haba phai ha ka kylla step, ka MLP FC ka la lah ban ïalehkai bha bad pyni ïa ka sap ïalehkai ba itynnad bad dei ha ka minit kaba 38 ba ka MLP ka la ïoh ïa ka nam tam ha kaba u B. Chhetri u la ïoh ban pynkhih nyngkong ïa ka jar lyngba ka penalty.
Haba phai sha ka kylla miet, ka jingïalehkai ka la kham itynnad shuh shuh ha kaba ka KMC ka la ïakhun tyngeh ban pynphai ïa ka kol bad dei ha ka minit kaba 50 ba ka KMC ka la ïoh ba pynïakhaid mar shi kol lyngba u B. Khongjee bad bud sa ka kol na u A Syiemlieh ha ka minit ba 57 bad na u D.Lyngdoh ha ka minit kaba 77 bad lyngba kitei ki lai kol ka KMC Sonapur FC ka la pynthikna ïalade ban rung syndon sha ka semi final ha kane ka lympung.
Ïa ka nam Man of the Match la ïoh ban khur da u D. Lyngdoh u rangïalehkai jong ka KMC Sonapur FC bad ïa kane ka khusnam la sam da u Bah J.B Tongwah , Oficer In-Charge Mawkyrwat Police Station.
Ka Mawlangwir ka la pyntip ruh ba ka jingïalehkai quarter final kaba khatduh kan long ha ka 10 tarik hapdeng ka Aphuyemi FC na Nagaland pyrshah 7Wasa FC na Jowai ha ka por 1 baje nohphai sngi.
