Shillong, Rymphang 04
Ka Meghalaya ka la khur ïa ka jingjop ha ka jingïakhun jong ka lympung Ranji Trophy plate group kaba la long ha Rangpo, Sikkim hadien ba ka la lah ban pynliem noh ïa ka Sikkim da 6 wiket.
Kane ka jingjop kan dei ruh kaba biang tam namar ha kane ka jingïalehkai, ka Meghalaya ka la shah tam run lypa ha ka Sikkim ha ka pali ba nyngkong hynrei ki rangïalehkai ka Meghalaya ki la ïakhun ha ka sngi kaba lai bad ban khur syndon ïa ka jingjop.
Kane ka jingjop ka la wan ruh lyngba ka jinglah ban ïalehkai bha jong u nongkawang bol u Aryan Borah uba la khur haduh 8 wiket bad ai tang 36 run, kaba la pynlong ïa ka Sikkim ban kamai tang 80 run bad hap lut ki wiket ha ka pali kaba ar. ïa kane ka thong la lah ban beh lyngba ka jingtied bha u kapten ka kynhun u Kishan Lyngdoh uba la kamai 69 run.
Lah ban pynkynmaw ba ha ka sngi sdang jong ka jingïalehkai, ka Sikkim ka la don hakhmat kata ha ka pali kaba nyngkong ka la tied 284 run katba ka Meghalaya ha ka pali ba nyngkong ka la tied tang 191 run.
Ka Sikkim kaba la tam lypa da 93 run ha ka pali kaba nyngkong, ka la tied 80 run ha ka pali kaba ar bad ban buh ka thong kaba 174 run ïa ka Meghalaya.
Ka Sikkim ha ka sngi ba ar, kata ha ka sngi Saitjaiñ ka la kamai 55 run bad hap 4 wiket hynrei kim shym la khmih lynti satia ba ha ka sngi U Blei haba bteng biang, kin lah ban tied sa tang 25 run bad hap lut ki wiket.
Kane kan dei beit na ka jinglah u Aryan, uba la ïoh mih madan ha ka sien kaba san na ka bynta ka Meghalaya ha kane ka lympung, uba la ïoh ban khur haduh 8 wiket bad ha ka pali ba nyngkong u la khur 4 wiket, kata haba kheiñ kyllum u la khur haduh 12 wiket bad ai 129 run bad ban khur syndon ruh ïa ka nam ‘Player of the Match’.
Ka thong kaba 174 kam shym long satia kaba suk watla ka dei kaba rit, ha kaba ka Meghalaya hadien ba ka la kamai 54 run ka la duh noh 3 wiket, ha kaba u Lee Yong Lepcha u la khur 2 wiket bad u Ankur u la khur shi wiket. Dei ynda la wan u Kishan bad u Jaskirat Singh Sacheva hapdeng madan ba la lah ban kyntiew ïa ka jingkamai run bad kine ar ngut ki la lah ban tied 108 run hynrei u Kishan um shym la lah ban don haduh kaba kut hynrei ban duh noh ïa la ka jong ka wiket.
Ka Meghalaya na ki 3 tylli ki jingjop bad ar tylli ki nam rem ha ka round robin, mynta ka la ïoh rung sha ka semi-final kum ka kynhun kaba ar na ka plate group. Ki semi-final jong kane ka lympung kin sdang naduh ka 9 tarik Rymphang hynrei ïa ka jaka ïalehkai bad ka kynhun ban ïakhun pyrshah ïa ka Meghalaya yn sa tip kham hadien.
