Shillong, Rymphang 04
Ki bor ba dei khmih ka tnad ki kam pynroi sor ki la khot ïa ka ‘tender’ na bynta ban ïaid shakhmat bad ka kam ‘Biomining’ kum shi bynta ban pynsting ïa u ñiut uba don ha Marten.
“Yn sa khot ïa ka jingkyrpad na bynta ka jingtyrwa ban leh ïa ka ‘Biomining’ ha Marten. Une u ñiut uba phi ïohi hangne (Marten), ngin pyrshang leh ïa kane (Biomining) khnang ban sting u ñiut ha Marten. Ngi buh jingkheiñ kumba 1 lak 50 hajar ton u ñiut ngin sa leh ïa ka Biomining,” la ong u Executive Engineer (EE) ka Shillong Municipal Board (SMB), Bah F.B. Chyne haba kren sha ki lad pathai khubor ha ka Sngi U Blei.
U la ïathuh ruh ba ka Directorate of Urban Affairs ka la khot ïa ka ‘tender’, bad katei ka kam ka lah ban sdang hapoh 3-4 bnai.
U Bah Chyne haba batai shaphang katei ka jaka theh ñiut u la ong ba ka ding ha Marten wat hapdeng u lapbah-lapsan – ka ding shapoh kam ju lip bad ka daw ka long namar ka jingmih jong ka ‘Methane Gas’ na u ñiut.
Haba ïathuh ba ka jingtwa u ñiut ha katei ka jaka ka ju jia naduh mynshuwa khamtam ha ka por slap, u EE u la ong ba ïa ka Marten la pyndonkam naduh u snem 1938 bad mynta ka la 86 snem, bad kumta ka jingbteng ban theh ñiut ha kane ka jaka, ka pynlong ïa ka jaka ban khapngiah bad kam don shuh ka jaka ka ban lait na u ñiut.
U la ong ruh ba baroh ki jingtei kiba don ha Marten ki dei kiba la tei hajrong u ñiut.
“Ka jaka ba theh ïa ki mar ba la tam kyntait na ki ‘Compost Plant’, ngi hap shu pynkhih sharum-shaneng naba ka la dap. Mynshuwa ngim ju ïohsngew ba kan twa ka Marten hynrei ha ki snem 2008-09 shaneng la sdang ka jingtwa,” u la bynrap.
