UK, Rymphang:
Ha kane ka khubor, la ong ba uwei u nonglute ha United Kingdom u la pynbthei ia kawei ka kor ATM Machine tang ba un ioh ban tuh ia ka pisa kat kaba don hapoh katei ka por. Hynrei la ong ba katei ka jingbthei ka la leit dei pynban na ka dur khmat jong uwei dkhot katei kynhun nonglute kiba don bynta ha katei ka kam.
Kane ka jingjia ka dei kaba la jia ha u Naitung jong u snem ba la leit, ha kaba 2 ngut ki nonglute ki la leit ban lute ia katei ka jaka sei pisa kaba don ha Northwood ban ioh tuh ia ka 1,60,000 Pounds lane (Rs. 1,68,56,128) kaba don hapoh jong katei ka kor machine.
Katkum ka video ba la ioh ring na ki camera CCTV ba la pyndait ha katei ka jaka sei pisa, la iohi ia uwei na kitei ki nonglute uba la leh donbor ia kawei ka briew kaba don hapoh jong katei ka ATM, katba uwei pat u dang tied da u tyrnem heh ia katei ka machine ba kan pait bad ba kin ioh ban lute ia katei ka pisa kaba don hapoh.
Hynrei katei ka jingthmu jongki ka la pulom noh hadien ba utei u bom IED uba ki la dep pyndait hapoh jong katei ka jaka, u la bthei bad leit dei pynban na ki bynta ka dur khmat jong uwei na kitei ki nonglute kiba don ha katei ka jaka. Ia kitei ki nonglute la ithuh kum u Wesley Shepherd bad u Benjamin Thompson bad wat hapdeng katei ka jingmynsaw, la ong ba ki la ioh ban rah kumba 93,000 Pounds ka pisa lane kumba Rs. 97,98,030, ha kaba ki nongsakhi ha katei ka jingjia ki la iohi ia ki pisa kiba la saphriang kylleng katei ka jaka ba kitei ki nonglute ki rah ia katei ka pisa kaba bun bad kaba la saphriang bad hap sha madan- madiah haduh ban da poi sha ka jaka ba kitei ki nonglute ki buh ia ka kali jongki ha katei ka por.
Hynrei la ong ba kitei ki 2ngut ki la shah kem noh tang hadien kumba katto katne taiew hadien katei ka jingjia bad ki pulit ki la ioh bat ia kitei ki 2ngut katba ki dang ñiah ia katei ka kali lyngba jong ka Kad Liengsuiñ jong ka Manchester, kaba ki liengsuiñ na katei ka Kad Liengsuiñ ki ju mih ban leit her sha Malaga, Egypt bad sha Mexico.
Hadien ba la tohkit bniah ia ki, kitei ki arngut ki la phla ia katei ka jingthmu leh kam runar jongki bad ban lute ia katei ka pisa ha katei ka jingjia bad kumta ruh la ong ba ki long ki nongtuh ba nyngkong kiba lah ban ioh ia ki tiar pynbthei kum u bom IED namar ym ju don na katei ka ri ki ban lute bad pynbthei da kitei ki jait tiar pynbthei kiba khlaiñ.
Haba ai jingkren sha ki lad pathai khubor, u heh ka tnat syntiat bad ka tnat tohkit, u la iathuh ba kitei ki arngut kim shym don pat ia ka jingthmu ban pynmynsaw ne ban pynthud ia ka jingim jong ki riew paidbah hynrei katei ka jing pynbthei jongki ka long tang ba kin ioh ban tuh ia katei ka pisa kaba don hapoh jong katei ka jaka.
