Washington, Rymphang:
Ka White House ha ka Sngi Balang ka la kren biang shaphang ka kynhun Islamic Resistance jong ka Iraq bad ong ba ka dei katei ka kynhun lehnoh kaba ther bom sha ka jaka treikam ba don ki shipai US ha Jordan ha kane ka taiew ba la dep. Katkum ki jingtip ba la ioh lum da ka tnat syntiat jong ka US, la ioh jingtip ba dei katei ka kynhun Islamic Resistance kaba don kti ha katei ka jingpynbthei bom bad jingther bom sha katei ka jaka ba don ki shipai ka US katba kitei ki shipai ki dang ioh thiah lyngngai ha ka por shiteng synñia.
Nalor jong kitei lai ngut ki shipai ka US kiba khlad ha Jordan, la ong ba ka la don sa kawei pat ka jingjia shah ther bom ha kaba palat 40 ngut ki shipai ka US ki la mynsaw jur ha ka Sngi U Blei ba la lah.
