Shillong, Rymphang 04
Ka England wat la ka la duh noh ïa ka wiket jong u Ben Duckett hynrei ka dang donkam sa 332 run ban khur ka jingjop pyrshah ïa ka India ha ka jingïalehkai test kaba ar kaba dang ïaid shakhmat mynta ha Visakhapatnam.
Ka England kaba la donkam ban tied 399 run ban jop ïa ka India, ka la sdang ïa ka pali kaba ar ha ka rukom kaba biang hynrei shwa ban pynkut ka jingïalehkai ha ka sngi kaba saw, ka la duh noh ïa ka wiket jong u Duckett uba la tied 28 run bad haduh ba kut ka sngi ka England ka la kamai 67 run bad hap shi wiket, ha kaba u Crawley u dang don ha madan na ki 29 run ba u la kamai bad un khmih lynti ban lah ban bteng.
Kumta ka sngi kaba san kan long kaba kongsan ïa baroh ar tylli ki Ri, ka England kan donkam ban ïalehkai jai jai ban kot sha ki 332 run katba ka India ruh kan khmih lynti ba kan ïoh ban khur ïa ki 9 tylli ki wiket kiba dang sah jong ka England.
Haba phai sha ka pali kaba nyngkong ka India ka la lah ban tied haduh 396 run bad kane ka la wan lyngba ka jinglah ban tied haduh 209 run marwei jong u Jaiswal, katba ka England ha ka pali ba nyngkong ka la tied tang 253 run, kaba la pynlong lypa ïa ka India ban tam da 143 run bad ka India ha ka pali kaba ar ka la tied 255 run ha kaba u Shubman Gill marwei u la tied haduh 104 run bad ka la buh ka thong ïa ka England ban tied 399 run ban jop.
