Ha ka Sngi U Blei, kumba 40 ngut ki MLA na ka seng Jharkhand Mukti Morcha (JMM) bad na kiwei pat ki seng kiba ïatreilang ha ka sorkar Jharkhand, ki la wanphai sha Ranchi na Hyderabad ban ïashim bynta ha ka jingïatynjuh bor ka ban long ha ka Lah Sngi U Blei ha Ïingdorbar Thawaiñ. Kine ki MLA ki la wan sah ha kawei ka ïing basa hajan Hyderabad hadien ba u nongïalam ka JMM, u Champai Soren, u la shah thung kum u Myntri Rangbah namar ka jingshah kem noh jong u Hemant Soren ha ka Enforcement Directorate (ED) namar ki jingkynnoh ba u la donkti ha ki kam bamsap bamngem. Ka jinghap leit sah jong kine ki MLA na Ranchi sha Hyderabad ka long ban ïada ïa ki na ka jingshah tan ha kiwei pat ki seng saiñpyrthei.
Kane kam dei ka sien banyngkong ha ka Ri ba ki MLA ki hap ban phet na ki ïing ki sem bad na ki jylla bad ban leit sah shipor ha ki ïing basa. Ngi kynmaw ba ha ka por ba pait ka Shiv Sena ha Maharashtra na u Uddhav Thackeray, ki MLA hapoh ka jingïalam jong u Eknath Shinde, uba dei mynta u Myntri Rangbah, ki la wan sha ha kawei ka ïing basa ha Guwahati namar ka jingsheptieng ïoh ki shah tan biang ha u Thackeray bad ïoh ba kin ym lah ban thaw sorkar. Ka la don ruh kaba kum kane ka jingjia ha Karnataka. Ka saiñpyrthei pynrieh bad pynphet kaba kum kane kan ym kut ha kane ka Ri bad kan dang ïai bteng, bad namarkata, ka saiñ hima sima ka jakhlia haduh katta-katta.
Ha Meghalaya, ha ki snem kiba mynshwa, ka la ju jia kumne. Ïa ki MLA na ki seng kiba kham rit lane ki MLA khlem seng, la ju rah sha Kolkata ne Delhi ne Guwahati bad ban pynsah ïa ki sha kito ki jaka da ki taïew. Tang mar ïa dep ka jingñiew ‘vote’, kita ki MLA kiba jop ki jah rngai na ïing bad na ki konstitwensi jong ki. Ki bapli kita ki MLA kim pat lap bha ban ïashad ïakmen bad ki paidbah, bad ki la shah rah noh bak sha kiwei pat ki jylla. Mynta, ka la kynjah namar ka jinglah jong ki nongthep ‘vote’ ban jied kham bun ki MLA na kawei ka seng bad ka jingbym donkam than ïa ka jingïarap jong kiwei pat ki seng saiñpyrthei. Ngi kyrmen ba kan ym wan jia kumtei ha Meghalaya namar ki paidbah kin duh ban leit ïakynduh ïa la ki jong ki MLA da ki sngi bad ki taïew.
Kine kiei-kiei baroh ki kdew ïa ka jinglong jakhlia jong ka saiñ hima sima. Lehse ym baroh kiba ïadon bynta ha ka saiñpyrthei ki dei kiba jakhlia, hynrei ki don pat ki bym ailad ïa kane ka kam ba kan long kaba khuid bad kaba hok. Ka jingrhah bor, jingkhwan shimet, jinglalot spah ki pynlong ïa ki MLA ba kin ïa ryngkoh na kawei ka liang sha kawei pat khlem jingtieng. Watla naduh u snem 2004 ka jingryngkang dieng kper jong ki MP bad MLA ka la duna namar ka jingpyrkhing ki kyndon ka Khyrnit Ba Shiphew jong ka Riti Synshar lane kata ka ‘Anti-Defection Law’, hynrei ki dang mih beit ki khep ba ki MLA kim lah ban shu shong khlem da don ha ka shuki kaba kham donbor lane ban ïa leit bsuh lang ha ka liang synshar. Don ki MLA kiba sngew ba dei tang lada don ha ka sorkar ba kin lah ban leh eiei na ka bynta ki konstitwensi jong ki.
Ngi kyrmen ba ha ki ilekshon ki ban wan, ki paidbah kin ym pharia ïa ka rukom jied MLA bad kin ailad tang ïa kawei ka seng ne kynhun ki seng ban synshar khnang ba ngin lait na kiba kum kitei ki kam jakhlia. Ki paidbah ki dei ruh ban ai jingsneng ïa kito ki seng saiñpyrthei kiba ju mlien ban thong da ka pisa ïa ki MLA ba kin phet seng lane kiba donkti ban pynkhih ïa ki sorkar tang namar ba kin ïoh don hi noh ha ka bor synshar watla ki paidbah ki khlem jied satia ïa ki.
