Washington, Rymphang:
Ka tnat Centers for Disease Control & Prevention jong ka US ha ka step Sngi Saitjaiñ ka la iathuh ba bun na ki paidbah kiba shong ha ka jhad paidbah na US ki la ioh kem pang prie bad pynhiar na ka jingleit jongki da katei ka jhad. La ioh jingtip ba ki don kumba 123 ngut ki nongleit jingleit bad 16 ngut ki dkhot lem bad ki nongtrei jong katei ka jhad ‘Queen Victoria’ bad kiba la kem pang naduh ba ki la mih na Florida ha ka 22 tarik u Kyllalyngkot mynta u snem.
Ka daw ba pynlong ban ioh ia katei ka jingpang ym pat lah ban tip satia hynrei la ioh jingtip pat ba baroh kitei kiba shong ha katei ka jhad ki la ioh kem pang lut tang mar ia shong ha katei hi ka jhad. Kane lehse ka lah ban dei na ka jinglong- jingman ka bym biang hapoh jong katei ka jhad lane ka lah ruh ban long namar ki bam bad ki jingdih kiba la sam hangtei.
La iathuh ba napdeng jong ki 1,824 ngut kiba shong ha katei ka jhad, 123 ngut ki dei kiba la ioh kem pang bad kaba long kumba 6.74% na ka 100% jong kito kiba shong ha katei ka jhad.
Haba iadei bad kane, ka tnat CDC ka la iathuh ba ka Cunard Cruise Line Ship ka la pynsah ia kitei kiba pang baroh ha ka jaka kaba kyrpang bad la ka jong na kitei kiba khlaiñ bad ia ka daw jong katei ka jingjia ym lah satia ban tip.
La ong ba katei ka jhad ‘Queen Victoria’ ka la mih na ka nongbah Florida naduh katei ka 22 tarik u Kyllalyngkot naka bynta ka jingiaid lynti ba 16 miet lynter. La pynbeit ba katei ka jhad kan sangeh ha San Francisco ha ka 7 tarik jong une u Rymphang.
