Hyderabad, Rymphang:
Ki la don palat 3,000 ngut ki khynnah ha kylleng ka jylla Telangana kiba la shah pyllait na ka jingshah pyntreikam jubor ha ki ‘riew shim kabu lyngba ka jingtreikam jong ka Operation Smile-X. Kane ka dei ka jingpyntreikam kaba la neh baroh shi bnai ban wad bad pyllait ïa ki khynnah kiba la jah bad kiba la shah die. Na kine ki 3,000 ngut ki khynnah rit, 719 ngut ki dei kiba la shah pyllait tang ha ka kynhun ki pulit ka Cyberabad.
Katba kiba bun kiwei pat ki la shah pyllait na ki jaka ba ki la shah pyntreikam, ki pulit ki la lah ban wad bad pyllait ïa 7 ngut ki khynnah ïa kiba la ïoh jingtip ba ki la jah. Kine ki kynhun ki la lap ïa ki khynnah rit kiba la jah kiba dei na Karnataka, Andhra Pradesh, Warangal bad Mahabubabad ha Telangana, ha ki por ba ki la pynlong ïa ki jingleit khynra.
Da ka jingïatreilang jong ki 676 ngut ki pulit ha kane ka jingpyntreikam, ki pulit ki la thaw ïa 120 tylli ki kynhun jong ki san ngut ki pulit kiba kynthup ïa u Sub-Inspector bad saw ngut ki pulit langrut ban leit wad bad pyllait ïa ki khynnah na ki jaka sangeh rel, bos, ki lad ba bun, ki jaka shna bad maramot kali, ki jaka shna mawit, ki jaka die sha bad na kiwei pat ki jaka. Ki pulit kiba la trei ha ryngkat ka Women Development and Child Welfare Department, Labour, Health, Child Welfare Committees (CWC), District Child Protection Units and NGOs ban ithuh ïa ki jaka ba la pyntreikam beaiñ ne set ïa kine ki khynnah ki la shem ba kiba bun na kine ki khynnah ki la shah leh beiñ bad shah leh donbor. Ki pulit ki la pyndonkam ruh da ki Applications kum ka Telangana Police, DARPAN bad TrackChild portal.
