Shillong, Rymphang 04
Ka Manchester United ka la khur ka jingjop, ka Chelsea ka la shah pynliem noh bad ka Nottingham Forest ka la ïakhaid ha ka jingïakhun pyrshah ïa ka AFC Bournemouth ha ki jingïalehkai jong ka lympung English Premier League (EPL) kiba la long ha ka sngi U Blei.
Haba phai sha ka jingïalehkai kaba la long ha Old Trafford, ka Manchester United ka la lah ban pynliem noh ïa ka West Ham United da 3-0 kol bad ïa kine ki kol la ïoh ban thep da u Rasmus Hojlund ha ka minit kaba 23 bad u Alejandro Garnacho ha ka minit kaba 49 bad 84, kaba la biang pura ïa ka Manchester ban khur ki 3 point pura.
Lyngba kane ka jingjop, ka Manchester United ka la kamai 38 point na ki 23 tylli ki jingïalehkai bad ban kiew sha ka kyrdan kaba hynriew ha ka miej ïakheiñ point katba ka West Ham United kaba dang ïoh 36 point ka la hiar sha ka kyrdan kaba hynñiew.
Ha kawei pat ka jingïalehkai, ka hat-trick kaba la ïoh ban khyrwit da u Matheus Cunha ka la biang pura ïa ka Wolverhampton Wanderers ban lah ban pynliem noh ïa ka Chelsea.
Haba phai sha ka jingïalehkai, dei ka Chelsea kaba la ïoh ban khyrwit kol nyngkong lyngba u Cole Palmer ha ka minit kaba 19 hynrei hadien kane ka kol, ki rangïalehkai ka Wolves ki la ïakhun tyngeh bad tang ha ka minit kaba 22, la ïoh ban pynphai ïa kane ka shi kol lyngba u Matheus Cunha bad ha shwa ban wai ka kylla step, ka Wolves ka la ïoh ka kol ba ar, ba la kum thep hi da u Axel Disasi sha la ka jong ka kol.
Ha ka kylla miet, watla ka Chelsea ka la ïakhun tyngeh hynrei ka Wolves ka la ïoh ban khyrwit sa ar tylli ki kol ba la ïoh thep da u Matheus Cunha ha ka minit kaba 63 bad 82 hynrei ha ka minit kaba 86 u Thiago Silva u la ïoh ban thep ka kol kaba ar jong ka Chelsea hynrei kane kam shym la lah ban biang naba ha kaba kut, ka Chelsea ka la shah liem da 4-2 kol.
Kane ka jingshah liem noh ka la pynlong ïa ka Chelsea ban hiar sha ka kyrdan kaba khatwei naba ka dang kamai 31 point na ki 23 tylli ki jingïalehkai, katba ka Wolves ka la kiew sha ka kyrdan kaba shiphew na ki 32 point ba ka la ïoh na ki 23 tylli ki jingïalehkai.
Ha kawei pat ka jingïalehkai, ka Nottingham Forest ka la ïakhaid noh da mar shi kol bad ka AFC Bournemouth. Dei ka Bourne-mouth kaba la ïoh ban thep ka kol ba nyngkong tang ha ka minit kaba 5 hynrei ha shwa ban wai ka kylla step, ka Forest ka la ïoh ban pynphai ïa kane ka shi kol lyngba u Hudson-Odoi.
Lyngba kane ka jingïakhaid, ka Bournemouth ka la ïoh 27 point na ki 22 tylli ki jingïalehkai bad don ha ka kyrdan kaba khatar katba ka Forest ka la ïoh 21 point na ki 23 tylli ki jingïalehkai bad kiew ha ka kyrdan kaba khathynriew.
