Paris, Rymphang:
Ha kane ka jingjia la ong ba 3 ngut ki la mynsaw na ka jingshah dung tari ha ka Sngi Saitjaiñ ha ka stashon rel Gare de Lyon jong ka nongbah Paris. Na ka liang ki pulit ki la ioh kem noh ia u suba don kti na katei ka kam thombor ha katei kajuh ka sngi.
La ong ba utei u runar u la leit poi sha katei ka stashon rel ha ka por 8:00 jong katei ka step Sngi Saitjaiñ, ha kaba u la leit ban thombor ia 3 ngut ki briew kiba don ha katei ka stashon kaba ki rel ki ju mih ban leit jingleit hapoh ri bad don ruh kiba mih ban leit pat shaduh Switzerland bad sha Italy ruh kumjuh.
Haba iadei bad kane, la ong ba uwei napdeng kitei kiba mynsaw u dei uba la mynsaw jur bad mynta u don hapdeng ka jingma kaba khraw.
Katkum ka tyllong khubor la ioh jingtip ba utei suba don kti bad uba long u runar ha katei ka jingjia, um shym pynmih kino- kino ki kyntien isih jaitbynriew ne kren pyrshah niam hapdeng katei ka jingleit thombor jong u. Haba ki pulit ki la ioh bat ia utei suba don kti ruh u la pyni da ka ‘Driving Licence’ jong ka ri Italy.
Namar kata, na ka liang ki pulit kin dang hap ban bud dien bad wad bniah bha haba iadei bad katei ka jingjia, bad lada utei u briew ba la ioh kem u dei shisha uba don kti ha katei ka kam, yn hap ruh ban wad bniah sa ia ka daw tynrai jong katei ka jingleit thombor jong u ha katei ka jaka.
