Shillong, Rymphang 04
Ka Shillong Lajong Foot-ball Club ka la lah ban pynliem noh ïa ka Aizawl Football Club da 1-0 kol ha ka lympung All India Football Federation’s U-17 Youth League kaba la long ha madan First Ground, Polo ha ka sngi U Blei.
Kane kan dei ruh ka jingjop kaba nyngkong jong ka Shillong Lajong hadien ba ka la ïakhaid ha ki 2 tylli bad shah rem noh kawei bad kane ka jingjop ka la kyntiew ïa ka Shillong Lajong sha ka kyrdan kaba saw ha ka group kaba don san tylli ki kynhun ha kaba kut jong ka first leg.
Ha kane ka jingïaleh-kai, ïa ka shi kol jong ka Shillong Lajong la ïoh ban thep da u Riborlang Lyngdoh Lyngkhoi ha ka minit kaba 45. U nongap kol jong ka Shillong Lajong u Pranav S u la khur ïa ka khusnam ‘Player of the Match’ uba la lah ban ïada ïa ka kol.
Ka Shillong Lajong FC mynta ka la khur 5 point, ban tam shi point ïa ka Harisinga Town Club kaba na Assam kaba don ha trai duh. Ka North East United FC ruh ka la khur 5 point hynrei ban tam pat da ka jingïapher ha ka jingthep kol, katba ka Football 4 Change Academy bad ka Aizawl ki la khur mar 7 point.
Ka jingïalehkai kaba nyngkong jong ka Shillong Lajong ha ka second leg kan long pyrshah ïa ka Football 4 Change Academy ha Third Ground, Polo ha ka sngi kaba ar ha ka por 2 baje mynsngi.
