Mumbai, Rymphang:
Kum shi bynta ban pyllait ïa ka nongbah na u drok, ki pulit jong ka Navi Mumbai ki la pynphai noh ïa 506 ngut ki bar ri kiba dei na ka ri lade ha u snem 2023, ha kaba 411 ngut napdeng jong ki ki dei ki nongshong shnong jong ka Nigeria ha kaba kine ki la shah khanglad ha kaba ïadei bad ki kam sniew ba ïadei bad u drok, la ïathuh ka tyllong khubor ba la wan na ki pulit.
Ha u snem 2023, ka kynhun kaba ju ïakhun pyrshah halor ki jingdih pynbuaid jong ka Navi Mumbai da kaba pynlong ïa ka jingleit khynra ha kylleng ka nongbah ki la ïohkem ïa ki nong Nigeria kiba la sah palat por bad pyndonkam da ki Visa ba long beaiñ, ha kaba kiba bun na kine la lap ba ki la donkti ha ki kam khaïi drok.
Naba la lah ban pynpulom ïa ki kam khaïi drok, ki pulit ki la pynjur ka jingpyntreikam pyrkhing ha kaba ïadei bad ka jingkhmih bniah ïa ki nong Nigeria kiba la sah tam ban ïa ka por ba la buh ha ka Visa jong ki.
“Haba la pynlong ka jingtohkit ïa ki nong Nigeria la shem ba ka long kaba jynjar bha namar ka jingeh ban sngewthuh ïa ki ktien ba ki kren bad kumjuh na ka jingbym kwah jong ki ban ïatreilang bad ki nongtohkit. Kiba bun na ki kim ju kham pyndonkam ïa ki Mobile Phone ha kaba kane kan lah ban ïarap ïa ngi ban pynlong ïa ka jingtohkit. Ka lad ka lynti kaba biang eh na ka bynta ban ïakhun pyrshah ïa u drok bad ban pynduh pyndam syndon, ha kaba la shem ba kiba bun ki kam sniew halor kane ka bynta ka dei kaba la donkti da ki nong Nigeria, ka dei ban thwet ïa ki bad ban phah noh sha ka ri ba ki wan ne long trai,” la ong uwei na ki heh pulit jong ka kynhun ba ïakhun pyrshah halor ki jingdih pynbuaid ha Navi Mumbai.
Nalor kane, ka kynhun Special Branch jong ka Navi Mumbai ka la pynlong ïa ka jingkhmih bniah bad pynphai noh ïa kito ki bar ri kiba la sah tam ha kane ka ri.
Nalor ki nong Nigeria, kiwei pat kiba la shah pynphai noh kiba dei ki bar ri ki kynthup ïa ki briew kiba na Uganda, Côte d’Ivoire, Bangladesh, Ghana, The Gambia, Kenya, Senegal, Tanzania, Cameroon, Zimbabwe, bad Liberia.
“Na ki 506 ngut, 23 ngut ki dei kiba la shah pynphai katkum ki hukum jong ka ïingbishar, katba kiwei pat kiba dang sah, kata ki 483 ngut kiwei pat la lap ba ki la sah beaiñ ha kane ka ri bad kine ki la shah pynphai noh hadien ba la ai shithi sha ki ba ki la dei ban mih noh,” la ong u Milind Bharambe, uba long u Commissioner of Police, jong ka Navi Mumbai.
