Shillong, Rymphang 04
Ka Border B XI ka la ïoh ban rah ïa ka nam lahduh jong ka lympung ba la tip kum ka 4th Open to All Men’s Invitation Football Tournament 2023-24 ba la pynlong da ka United Sports Club Nongsohphan ha madan Nongrim Nong sohphan.
Ha kane ka lympung kaba la sdang naduh mynshem snem, ki la don haduh 32 tylli ki kynhun kiba la wan ban ïashim bynta hynrei ha kaba kut, ka Border B XI bad ka Jaguar Football Club ki la ïoh rung sha ka final.
Haba phai sha ka jing-ïalehkai final ba la long ha ka sngi Saitjaiñ, ka Border B XI ka la pynliem ïa ka Jaguar FC da 3-0 kol bad ban rah syndon ïa ka nam lahduh bad ruh ka khusnam song pisa kaba long T.1.50 lak ryngkat ka trophy katba ka Jaguar kaba la shah rem ha ka final ka la khung T.70 hajar ryngkat ka trophy.
Ka jingthmu ba ha-khmat ka United Sports Club Nongsohphan ban pynlong ïa kane ka lympung phutbol ka long ba ka don ïa ka jingthrang ban kyntiew ïa ka sap ka phong ki khynnah ïaleh-kai bad kumjuh ruh ïa ka jingïalehkai phutbol ha ka dong ka thaiñ Riwar.
Ka Club ka la kwah ban pyntip ruh ba ka madan Nongsohphan ka dei tang ma ka, ka madan kaba biang bad paka ban pynlong ïa ki jingïalehkai ne ki lympung phutbol ha ka dong ka thaiñ Riwar.
Ha kane ka sngi pynhap pyrda noh ïa kane ka lympung ïalehkai, la ïadon lang ryngkat u Symbud Myntri Rangbah ka jylla u Bah Prestone Tynsong kum u kongsan, ka Kong Grace Mary Kharpuri, MDC ka thaiñ kum ka symbud kongsan, ka SDO Civil Sub-Division, ki riew rangbah ka thaiñ Riwar lem bad ki nongshong shnong kiba la wan ban pyndap ïa ka madan ban ai ka jingkyrshan ïa ki kynhun ïalehkai.
