Shillong, Rymphang 04
Ka Ivory Coast bad ka South Africa ki la ïoh rung sha ka semi-final jong ka lympung Africa Cup of Nations hadien ba ki la khur jingjop ha ka quarter-final.
Haba phai sha ka jingïalehkai, ka Ivory Coast ka la khur jingjop pyrshah ïa ka Mali lyngba ka kol kaba la ïoh ban thep da u Oumar Diakite ha ka minit kaba 122 hadien ba ka jingïakhun ka la kut noh ha ka jingïakhaid da mar shi kol haduh ba kut ka 90 minit.
Ha kane ka jingïalehkai, Ivory Coast tang ha ka minit ba 43, ka la duh noh ïa uwei u rangïalehkai kata u Odilon Kossounou hadien ba u la shah beh na ka jingshah sei ‘Red Card’ bad nalor kane ka la shah thep ruh shi kol ha ka minit kaba 71 ba la khyrwit da u Nene Dorgeles na ka bynta ka Mali.
Hynrei dei tad ha ka minit kaba 90 shwa ban wai ka jingïalehkai, ba ka Ivory Coast ka la ïoh ban pynphai ïa kane ka kol lyngba u Simon Adingra, kaba la pynlong syndon ban rah ïa ka jingïalehkai sha ka ‘extra time’.
U Diakite uba la dep ïoh yellow card, u la ïoh pdiang sa kawei ka yellow card ha shwa ban wai namar ka jinglaw sopti ban lehkmen hadien ka jingïoh thep kol bad kane ka la pynlong ba un shah sei syndon da ka ‘Red Card’ bad ruh ba un duh ban ïakhun semi-final pyrshah ïa ka DR Congo.
Ha kawei pat ka jingïakhun, ka jinglah jong u Ronwen Williams uba dei u kapten ka South Africa ban ïada haduh saw tylli ki bol ba la shut penalty, ka la pynlong ïa ka South Africa ban rung sha ka semi-finals jong ka 2023 Africa Cup of Nations hadien ba ka jingïalehkai pyrshah ïa ka Cape Verde ka la kut noh ha ka jingïakhaid khlem da don kiba ïoh pynkhih jar.
Haba phai sha ka jingïashut tie-breaker, ka South Africa ka la jop da 2-1 kol ïa ka Cape Verde.
Mynta, ka South Africa ka la ïoh biang ka kabu ban ïakhun pyrshah ïa ka Nigeria ha ka semi-final, hadien ba ka la shah liem ha u snem 2000 ha ka Nigeria da 2-0 kol.
