Shillong, Rymphang 04
U Nishanta Chakraborty u la ïoh ban tied ïa ka spah run bad ban pynlong ïa ka Meghalaya ba kan lah ban kamai 261 run bad hap 7 ha ka sngi ba nyngkong jong ka lympung U-23 Men’s Col CK Nayudu Trophy pyrshah ïa ka Nagaland kaba la long ha madan MCA, Shillong ha ka sngi U Blei.
U Nishanta uba la tied baroh shi sngi u la tied haduh 119 run na ki 218 tylli ki bol bad ban dang lah pynneh ïa la ka jong ka wiket. Ka jingkamai run kaba la ïoh jingïaroh namar ha ka jingïalehkai ba la dep pyrshah ïa ka Arunachal Pradesh u la tied tang 8 run.
Haba phai sha ka jingïalehkai, ka Nagaland kaba la jop ïa ka jingkynting pisa ka la kam trai ban kawang bol nyngkong da ka jingthmu ban kham ïoh jingïarap ki nongkawang bol na ka madan. Watla ka Meghalaya ka la duh noh ïa ka wiket jong u Mrityunjay Bharali tang ha ka over kaba nyngkong hynrei ka la lah pat ban shan haduh ka over kaba 10 khlem da duh wiket bad dei ha ka over kaba 12 ba u Kush Agarwal u la duh noh ïa la ka wiket.
U Nishanta bad u Swastic Chettri ki la lah ban kamai lang haduh 101 run hynrei u Swastic hadien ba u la tied 55 run na ki 100 tylli ki bol u la duh noh ïa la ka jong ka wiket.
Kumta ka Meghalaya ynda ka bteng biang ïa ka jingtied ha ka step jong ka sngi Nyngkong kan khmih lynti ban kot la kumno kumno sha ka 300 run.
