Chennai, Rymphang:
U Myntri jong ka tnat pla tyngka ha ka jylla Tamil Nadu u Thangam Thennarasu un sa wanrah ïa ka dorbar mang tyngka jong u snem 2024-25 ha ïingdorbar ha ka 19 tarik, Rymphang.
Kane ka dei ka dorbar mang tyngka ka ban don hadien ba u la sdang ban shimti ïa ka kam kum u Myntri ka tnat pla tyngka ha ka jylla.
Ka bynta kaba nyngkong jong ka dorbar jong ka Assembly na ka bynta une u snem kan sa long ha ka 12 tarik, Rymphang ha kaba yn sa ïoh jingkren na u Lat jong ka jylla u RN Ravi.
U Lamphang jong ka Assembly u M Appavu u la pynbna ïa kane ha ka por ba la don ka jingïalang bad ki nongthoh khubor ha kine ki khyndiat sngi ba la leit.
“U Myntri ka pla tyngka, ha ka 20, Rymphang, un sa wanrah da ka Tamil Nadu Appropriation (vote on account) Bill ka ban pynbiang ha kaba ïadei bad ka jingshim pisa na ka song ba la lum kum shi bynta jong u snem ka kheiñ ka diah kaba la long ha ka 1 tarik, Ïaïong,” la ong u Appavu.
Haba la buh jingkylli la ka sorkar ka la pynkhreh lypa ne em halor kane kumba la don ha ka mat ïakren ha u snem ba la lah, u la ong ba ka jingpynkhreh ka dei ka kamram jong ka sorkar bad ka la dei ban pyndep ïa kata.
U la ong ruh ba kam shym la don kano kano ka jingkynthoh sniew la ka long ïa u Lamphang ne ka sorkar ha u snem ba la lah.
“Ha une u snem ba mynta baroh kan sa ïaid beit,” u la bynrap.
U Ravi u la mih shabar ka ïingdorbar ha u snem ba la lah haba u Myntri Rangbah u MK Stalin u la pyrshah halor ka jingïaidlait jong u Lat ban pynkhreh lypa halor ka jingai jingkren.
