Nongstoiñ, Rymphang 05
Ka Nongstoiñ District Sports Association (NDSA) kan sa pynhap pyrda noh ïa ka lympung ïalehkai 1st Division, ha kaba ka kynhun ïalehkai jong ka Mawïong Pyndengrei kan ïakhun pyrshah ïa ka Nongstoiñ FT.
Na ka liang ka NDSA ka la pyntip ba ka jingïakhun final jong kitei ki ar tylli ki kynhun ha ka 1st Division kan long ha ka por 11 baje mynstep ha madan NDSA, ha Nongpyndeng.
Nalor nangta ka la ong ruh ba ha katei ka sngi u MLA ka Nongstoiñ u Bah Gabriel Wahlang un long kum kongsan .
Ka NDSA, ka la pyntip ruh ba ha katei ka sngi kan don ruh ka jingïakhun kaba ibang tam hapdeng ka Pyndengrei bad ka Khliehmawlieh YC kaba long ka jingïalehkai kaba khaduh ban pynkut ïa ka league jong ka Super Division jong kane ka samoi ïalehkai jong u snem 2023-24 katta ha ka por 1:45 janmiet.
Nangta, haba phai sha ka Super Division nalor kitei ki ar tylli ki kynhun ba kynthup ïa ka Pyndengrei bad ka Khliehmawlieh kiba ban ïakhun ha katei ka sngi 10 tarik mynta u bnai, ha ka 8 tarik ka jingïalehkai ha ka Super Division kan long hapdeng ka Mawliehbah SC pyrshah ïa ka Mawkawah ha ka por 11:20 mynstep, ka Tiehsaw Pengkyllut SC pyrshah ïa ka Sawlad SC ha ka por 1:30 janmiet.
Shuh shuh ha ka 9 tarik mynta u bnai pat ka Mawlarshong pyrshah ïa ka Tiehrit FC ha ka por 11:20 mynstep, katba ha ka por 1:30 janmiet ka Nongpyndeng SS&CC pyrshah ïa ka Upper New Nongstoiñ.
