Kohima, Rymphang:
Ka Yimkhiung Akherü Arihako (YAA), ka kynhun seng jong ki khynnah pule jong ka jait bynriew Yimkhiung Naga, ki la bteng ban pynlong ïa ka jingïakhih kaba khlem sangeh halor ka jingbym lah ban leh ei ei jong ka sorkar Nagaland na ka bynta ban ïakren halor ki jingeh ba ki skul ki ïakynduh na ka daw jong ka jingduna palat ki nonghikai ha ki distrik jong ka Shamator bad Kiphire.
Ha ka por ba la don ka jingïakhih kaba la sdang naduh ka sngi Thohdieng, ka dorkhas ba la phah sha u Principal Director, Directorate of School Education (DoSE), la phah lyngba ki jaka treikam jong u DC Shamator bad SDO (CIVIL) Chessore hapoh ka Shamator distrik, bad ADC Pungro hapoh Kiphire distrik.
Ki khynnah pule ki la rah da ki Placard kiba ong, “Ngi kwah ban long doktor bad Engineer, phah sha ngi ïa ki nonghikai Maths bad Science”, “Ki khynah ki la nang bun, ki nonghikai pat ki duna; Ka por jong ka jingkylla”, “Lada ym don nonghikai, ym don jingnang-jingstad,” bad kiba bun kiwei pat.
Ka kynhun jong kine ki khynnah pule, ka la pynkynmaw ïa ka sorkar ba ha ka 30 tarik, Jylliew, 2023, ïa ka dorkhas la phah sha ka sorkar halor ka jingdawa ba la dei ban khmih bniah halor ka jingduna nonghikai.
Kumjuh, ka la pynkynmaw ruh ba la phah ïa ka shithi ha ka 22 tarik, Nailar, 2023, bad ha ka 18 tarik, Kyllalyngkot, 2024, nalor kane 14 sngi la aipor hynrei kam shym la lah ban leh ei ei.
Ha ka jingïakhih jong ki, kine ki khynnah pule ki la rai ba kan ym dei ban don kano kano ka jingpynrung skul thymmai lada jia bym leh ei ei ne katba ym pat lah ban pynurlong ïa ki jingdawa ba la buh.
Na ka liang u nongaiktien jong ka YAA, u Lemchay Thongley, ha ka jingïakren bad ki nongthoh khbuor, u la ong ba ka seng ka la dawa ba la dei ban mang da kumba 280 ngut ki nonghikai ha baroh ki bynta kiba kynthup ki nonghikai Physical Education Teacher (PET), Graduate Teacher (GT), Post Graduate Teacher (PGT), Hindi Teacher, Language Teacher, bad kiwei pat.
