Shillong, Rymphang 05
Da ka jinglah ban ïalehkai bha u Jasprit Bumrah kum nongkawang bol ban khur 9 wiket ka la pynlong ïa ka India ban ïoh jingjop da 106 run pyrshah ïa ka England ha ka jingïalehkai Test kaba ar ha ka Lah Sngi U Blei na ka bynta ban ïakhaid mar 1-1 kol na ki san sien ïakhun.
Ka England kaba la donkam ban kynjoh sha ki 399, pynban ka la lah ban kamai 292 run ha ka sngi kaba ar kaba la long ha Visakhapatnam watla u Zak Crawley u la ïoh ban khyrwit 73 run.
U Bumrah ryngkat bad u Ravichandran Ashwin, uba la khur haduh 500 wiket ha ka jingïalehkai Test, u la khur 3 wiket kynthup ïa ka jingshah pynkhyllem khadtduh u Tom Hartley na ka bynta ban khur ïa ka jingjop.
Kham hashwa u Shubman Gill la lah ban ïalehkai bha da kaba u la lah ban tied 104 run na ka bynta ban pynskhem ïa ka India ban wanphai da ka jingkhlaiñ bor ha ka sngi kaba lai pyrshah ïa ka England, kaba la jop ha ka jingïalehkai kaba nyngkong jong ka Test.
Ka England kaba la wan beh ïa ka thong, ka la pyrshang ban ïakhun tyngeh hynrei ka la lah ban tied tang 292 run bad hap lut ki wiket ha ka inning kaba ar jong ka sngi kaba saw.
Ka jingïalehkai Test kaba lai kan sdang naduh 15 tarik mynta u bnai ha Rajkot, ha kaba baroh ar ki kynhun ki donkam ban ïakhun bad na ka liang ka England ka la khmih lynti ban leit sha United Arab Emirates na ka bynta shi taiew.
