Shillong, Rymphang 05
Ka kynhun ki rangïalehkai phutbol (Under-18) ka la shah pynkup da ka song pisa kaba T. 4 lak tam hadien ba ka lah ban khur ïa ka nam lahduh ha ka Khelo India Youth Games 2024 da kaba pynliem noh ïa ka Punjab da 2-0 kol ha ka final kaba la long ha ka 31 tarik u Kyllalyngkot 2024 Chennnai.
Ïa kane ka jingpynkup burom la pynlong da ka tnat Sports and Youth Affairs jong ka Sorkar Jylla ha ka Lah Sngi U Blei ha U Soso Tham Auditorium, Shillong. Ha kane ka sngi la ïadon lang u Myntri Rangbah ka Jylla u Conrad K. Sangma kum u kongsan, kumjuh u Myntri ka tnat ïalehkai Bah Shakliar Warjri kum u symbud kongsan, ka Myntri ka tnat ka koit ka khiah ka Dr. Ampareen Lyng-doh, ka Director ka tnat ïalehkai Kong Isawanda Laloo, u Working President ka Meghalaya State Olympic Association u Bah John F. Kharshiing, u General Secretary ka MSOA u Bah Finely Pariat, ki nongmihkhmat jong ki Synjuk ïalehkai bapher bapher, ki ophisar jong ka tnat ïalehkai bad kiwei kiwei.
Kine ki nongïalehkai kiba don 19 ngut ki la ïohpdiang da ka song pisa mar T.22,000 kynthup ïa ki coach bad asst coach. Kumta haba khein lang ia ka jingiohpdiang ia kane ka kynhun ialehkai phutbol ka long T. 4 lak tam.
Na ka liang u kapten ka kynhun u Colinsalmon Lyngdoh uba na ka shnong Mawkyrwat, South West Khasi Hills u la pynpaw ka jingsngewkmen halor kane ka jingshim khia ka Sorkar ban pynkup burom da ka song pisa.
“Lyngba kane ka jingpynkup burom, ngi lah ban pyndonkam ha ka ban thied ïa ki tiar ialehkai bad kumjuh ban bam ïa ki jingbam ba tei met namar ka long kaba kongsan ban ïoh ïa ka bam kaba biang ka ban tei ia ka met ka phad.”
“Ka jingjop ka jong ngi ka dei tang ka jingsdang, hynrei ngi dangdonkam ban iai trei shitom na ka bynta kiwei pat ki lympung. Watla ngi la lah ban pynurlong, hynrei ka jingangnud ka jong ngi ka long ba ka kynhun ïalehkai (senior) ka Jylla kan lah ban khur ïa ka nam lahduh ha ka Santosh Trophy.”
