Karachi, Rymphang:
Ha katei ka jingjia la ong da ki khat ngut ki lehnoh ki la leit ban thombor ia kawei ka thanat pulit kaba don ha shathei jong ka Pakistan ha ka step Lah Sngi U Blei ha kaba 10 ngut ki heh pulit ki la kyllon iap ha katei ka sngi.
Katei ka jingjia ka long tang hadien khyndiat sngi ba ka Pakistan kan ioh ban pynlong noh ia ka ilekshon paidbah ha kaba la sakhi ruh ia shibun tylli ki jingjia thombor pyrshah ia ki heh nongialam jong katei ka ri.
Hadien ba la ioh ban iakren bad ki pulit halor kane ka jingjia, la ong ba ki don kumba 30 ngut ki lehnoh kiba la leit thombor bad siat dusmon ia ki pulit kiba don hapoh jong katei ka thanat na lai tylli ki bynta. Nangta ka la don ruh ka jing-iakhun kumba ar kynta shiteng hapdeng jong kitei ki pulit bad ki lehnoh ha katei ka step.
Katei ka thanat pulit ka dei kaba don ha Chaudhwan bad kaba hap hapoh ka distrik Dera Ismail Khan. La ong ruh ba 10 ngut ki heh pulit na katei ka thanat ki la mynsaw na katei ka jingshah siat bad jingshah thombor ha kitei ki lehnoh ha katei ka step.
Hynrei la ong ba kitei ki thaiñ khappud jong ka distrik Khyber Pakhtynkhwa ki long ki thaiñ ba ki kam thombor jong ki lehnoh Pakistan kum ki Taliban, Islamic State bad kiwei de ki kynhun lehnoh kiba ju thombor ia ki pulit bad ki ophis sorkar na ka por sha ka por mynta la bun snem.
La iathuh ruh ba kitei ki lehnoh ki la ioh ban rung hapoh katei ka thanat pulit bad ban rah ia ki tiar siat bad kat ki tiar kiba donkam na katei ka thanat ha katei ka step kaba ki leit ban thombor ia katei ka jaka treikam ki pulit.
Nalor nangta, ki pulit ki la iathuh ruh ba ki la ioh ban pynliem ia kumba 24 ngut ki lehnoh ha kane ka taiew ba la dep ha ka jingleit khynra jong ki bor pahara ha ki thaiñ Southwest jong ka Pakistan.
Ka tnat Election Commission jong ka Pakistan ha ka taiew ba la leit ka la dep pynbna ba ka jingthep vote paidbah kan iaid shakhmat kumba la pynbeit ban long ha kane ka Sngi Palei ka 8 tarik u Rymphang, 2024.
Namar kata, ki bor pyniaid ka Pakistan ki la pynbeit ban phah da ki hajar ngut ki bor pahara bad ki pulit ki ban ap pahara ha kylleng ki jaka thep vote bad ha man ki kyndong-kynshrot jong katei ka ri khnang ba kan ym don jingthut ne wanrah jingma eiei ia ki paidbah kiba leit ban ïashim bynta ha katei ka jingthep vote kaba la dep pynbeit bad pynkhreh.
