Washington, Rymphang:
Katkum ki khubor, la ong ba ka United States ha kane ka kynti ka la pynbna ba kan iai ther bom bad ther ‘namding sha ki ktem lehnoh Houthi kiba don ha Yemen. Kane kan jia hadien ba 3 ngut ki shipai ka US ki la shu duh ei ia ka jingim ha ka jingleit thombor jong katei kynhun lehnoh kiba ioh jingkyrshan na ka Iran.
Kumta ki nongialam ka United States ha kane ka por ki la pynbna ba ka US kan nym ailad ia kum kitei ki jingjia bad kiba long ki kam thombor jong ki lehnoh na Iran. Nalor kata ruh la ong ba ka US kan iai ther ‘namding bad ther bom kylla sha kitei ki jaka treikam bad ki ktem jong kitei ki lehnoh kiba don ha katei ka bynta.
La ong ba ka United States bad ka Britain ki la leit thombor ia kumba 36 tylli ki ktem lehnoh hapoh Yemen ha ka Sngi Saitjaiñ. Kane ka dei ruh ka sien ba ar ia ka US ba kan leit thombor bad pynhiar kput ia kitei ki lehnoh na Iran hadien ka kam thombor jong ki kaba la shim ia ka jingim jong 3 ngut ki shipai ka US hapoh Jordan ha ka taiew ba la leit.
Katei ka jingleit ther bom jong ka US bad Britain ha ka Sngi Saitjaiñ ka long ha ki 3 tylli ki bynta jong ka Yemen kaba ki lehnoh Houthi ki ju shong na katei ka nongbah ban ioh ther bom sha ki jhad kiba don ha Red Sea.
Kine ki jingjia ki long kiba dang shu jia shen bad kiba wan jia namar ka jingleit hiar thma ba khlem sangeh jong ka Israel pyrshah ia ki lehnoh Hamas kiba synshar hapoh ka nongbah Gaza jong ka Palestine.
