Colombo, Rymphang:
Ki shipai duriaw ka Sri Lanka ki la ioh bat bad kem noh ia 23 ngut ki nongtong doh na India bad kurup ruh ia ki lieng jong kitei ki nongtong doh kiba leit rung be-aiñ shapoh u pud- u sam jong ki bynta duriaw ka Sri Lanka.
Ia kitei ki nongtong doh baroh ha ryngkat kitei ki 2 tylli ki lieng la ioh bat bad kem noh ha ka Sngi Saitjaiñ jong kane ka taiew ba la dep na ki bynta ka Delft Island, Jaffana.
Ia kitei 23 ngut ki nongtong doh na India la kit noh pat sha Kankesanthurai Harbour khnang ban aiti sha ka tnat Mailadi Fisheries Inspector na ka bynta ki jingtohkit bad ki kam ba iadei bad kane.
La ong ba ka tnat shipai duriaw jong ka Sri Lanka ka la pynlong khnang da ka jingpahara kaba kyrpang ban ioh tehlakam ia ka jingleit rung be-aiñ ki nongtong doh na ka por sha ka por. Kumta ha kane ka por ka tnat shipai duriaw ka Sri Lanka ka la rai ban leh da kaba tyngeh bad ka la bat noh ia kitei ki nongtong doh baroh 23 ngut khnang ba ka sorkar India kan shim khia ban peit bniah bad ban buh kyndon halor ki nongtong doh na ka ri jongka.
La ong ba kitei ki shipai duriaw ki ju leit pahara khah- khah ha ki um duriaw jong ka Sri Lanka ban tehlakam ia ka jingleit rung be-aiñ jong ki nongtong doh ym tang na India hynrei jong kiwei kiwei ruh ki ri ba marjan jongka.
Kum shi bynta haba iadei bad kane, ka Northern Naval Command ka ju phah ruh da ki ‘Fast Attack Craft’ kiba dei jong katei hi ka tnat shipai duriaw ka Sri Lanka ban tehlakam ia ka jingleit rung be-aiñ ki nongtong doh ba nabar ka ri.
