Shillong, Rymphang 05
U Myntri Rangbah ka Jylla u Conrad K. Sangma u la kyntu ïa ki synjuk ïalehkai ba kin pynleit jingmut ban kyntiew ïa ki kam ïalehkai ha ki district bapher bapher khnang ban lah sei ïa ki khynnah ïalehkai kiba kynsai.
“Nga kwah ban ïohi ba baroh ki synjuk ïalehkai kiba don ha ki district jong ka Jylla ba kin pynlong ïa ki lympung ïalehkai bapher bapher namar lada ngim lah ban kyntiew ha ki district level ngin ym lah ban sei ïa ki sap ïalehkai ba kyrpang jong khynnah,” la pynpaw u Conrad ha ka prokram pynkup burom ïa ki khynnah ïalehkai kiba la khur takma ha ka 5th Meghalaya Games kaba la kut ha u Kyllalyng-kot mynta u snem ha Tura, West Garo Hills.
Ha kane ka prokram kaba la long ha ka Lah Sngi U Blei ha U Soso Tham Auditorium, Shillong, u Myntri Rangbah u la kyntu ban pynkhlaiñ ïa ki synjuk ïalehkai kiba don ha ki district bapher bapher bad na ka liang ka Sorkar Jylla ka long ba la kloi ban kyrshan ki lad jingïarap na ka bynta kitei ki lympung.
Shuh shuh u la ai khublei ruh ïa ki nongïalam ka Meghalaya State Olympic Association (MSOA) kumjuh kiwei ki synjuk kiba hap hapoh jong ka, kiba la trei shitom ban ïasnoh kti lang na ka bynta ban pynlong ïa ka Meghalaya Games kaba jop.
Ha kane ka sngi, ka tnat ialehkai ka la pynkup burom haduh 1140 ngut ki nongïalehkai da ki song pisa hadien ba ki la lah ban khur ia ki takma ksiar, rupa bad rnong.
Ïa kane ka prokram la pynlong ha U Soso Tham Auditorium, Shillong ha kaba la ïadon lang u Myntri Rangbah ka Jylla u Conrad K. Sangma kum u kongsan, kumjuh u Myntri ka tnat ialehkai Bah Shakliar Warjri kum u symbud kongsan, ka Myntri ka tnat ka koit ka khiah ka Dr. Ampareen Lyngdoh, ka Director ka tnat ialehkai Kong Isawanda Laloo, u Working President ka Meghalaya State Olympic Association u Bah John F. Kharshiing, u General Secretary ka MSOA u Bah Finely Pariat, ki nongmihkhmat jong ki Synjuk ialehkai bapher bapher, ki ophisar jong ka tnat ialehkai bad kiwei kiwei.
Kane ka jingpynkup burom ka long ruh kum ka jingpynshlur ïa ki nongïalehkai ba kin dangïai trei shitom ha kiwei pat ki lympung ïalehkai ki ban sa wan.
Lah ban kynkynmaw ba katei ka Meghalaya Games, ka East Khasi Hills District kaba la rah ïa ka nam lahduh, ka la khur haduh 359 tylli ki takma. Kine ki kynthup ïa 132 tylli ki takma ksiar, 105 tylli ki takma rupa bad 122 tylli ki takma rnong hadien ba ki la lah ban pynpaw ïa ka jingtbit ha ki 23 tylli ki jait jingïalehkai bapher bapher.
Ka District kaba wan ba-ar ka dei ka Ri Bhoi District kaba la ïoh ban khur 79 tylli ki takma ba kynthup ïa 27 tylli ki takma ksiar, 22 tylli ki takma rupa bad 30 tylli ki takma rnong. Ka West Jaiñtia Hills District ka la wan ha ka kyrdan balai, ka la khur 68 tylli ki takma kynthup ïa 25 tylli ki takma ksiar, 18 tylli ki takma rupa bad 25 tylli ki takma rnong.
Ka West Garo Hills kaba long ka district kaba la pdiang ban pynlong ïa kane ka lympung, ka la ïoh ba kan khur 73 tylli ki takma, kata 17 tylli ki takma ksiar, 17 tylli ki takma rupa bad 39 tylli ki takma rnong.
