Washington, Rymphang:
U Secretary of State jong ka United States- u Antony Blinken ha ka Sngi U Blei u la leit ban hiar sha Middle East ban leit iakren bad pyrkhat kam haba iadei bad ka jingiakhun ban ioh pyllait noh ia baroh kito kiba shah rahbor bad kiba dang don hapoh ka kti ki lehnoh Hamas.
La iathuh ba kane ka long ka sien ba 5 ia u Blinken ba un leit jurip sha Middle East naduh ba la sdang ka thma hapdeng ki lehnoh Hamas bad ka Israel naduh ka 7 tarik u Risaw jong u snem ba la leit. Kane ka jingleit jurip jong u Blinken ha kane ka sien ruh ka long kum shi bynta ban pynpaw ia ka jingsngew khia na ka United States haba iadei bad ka jingleit thombor ba khlem sangeh jong ka Israel ia ka Gaza, watla ka US ka long ka nongkyrshan kaba pynshlur bad ai mynsiem ia ka Israel ban iaid shakhmat ia ka thma pyrshah ia ki lehnoh Hamas kiba la sdang ban leit ktah kti hi ia ka Israel ha u Risaw jong u snem 2023.
