Kohima, Rymphang:
Kum shi bynta ban pynïoh ïa ka jingshngaiñ bad ban pyntikna ha ka ban pynduna ïa ki jingïakynad, ki pulit jong ka Manipur ki la pynlong ïa ki jingleit khynra, sha kiba bun ki thaiñ bad buh ruh ïa ki Naka Checking sha kylleng ki bynta jong ka Manipur bad kumjuh ha ki distrik kiba don ha ki jaka lum bad ki jaka them.
Ka jingleit khynra ka long shi bynta halor ka jingthmu ban ïakhun pyrshah halor ka jingbun jong ki jingïakynad bad ban tehlakam ïa ka jinglong jingman ha ka thaiñ.
Ki shipai ïada ri ki la pynlong ïa ka jingleit khynra ha kine ki thaiñ khamtam sha ki thaiñ ba ju kham jia ki jingïakynad, ha kaba ki la pyntreikam ïa ki shipai ban pahara ha kiba bun ki jaka kiba don ha kane ka thaiñ.
Ha kaba ïadei bad ka jingpyntreikam, ka la don ka jingpyrkhing ha kiba bun ki bynta khnang ban lah ban pynïoh ka jingshngaiñ ha ka thaiñ.
Kane ka jingpyntreikam ka kynthup ha kaba ïadei bad ka jingkhmih bniah ïa ki kali kiba ïaid ha shi lynter jong ki surok bah kiba don ha ka thaiñ bad ka jylla hi baroh kawei.
Kumba la ïoh jingkheiñ la ong ba ki la don baroh kumba 141 tylli ki Naka ne ki Checkpoint ba la buh ha ki distrik bapher bapher jong ka Manipur, kaba kynthup ha ki jaka lum bad ki jaka them.
Ha kaba ïadei bad kane ka jingpyntreikam, ki pulit ki la ïoh ban kem ïa 225 ngut ki briew kiba la donkti ha ki jingïakynad na kiba bun ki distrik jong ka jylla.
