Shillong, Rymphang 06
Ka kynhun ïalehkai kriket ka Jylla ka la bteng ban khur ïa ka jingjop kaba san sien lynter ha ka U-23 men’s Col CK Nayudu Trophy (plate group) hadien ba ka la lah ban pynliem noh ïa ka Nagaland da 134 run ha ka Sngi Ba-ar ha madan MCA, Polo.
Haba wan ban beh ïa ka thong kaba 328 run na ka bynta ban khur ïa ka jingjop, ka Nagaland ka la shah pynkhyllem baroh ki nongtied na ka bynta ban kamai tang 193 run.
Hapdeng ka jingdum ka bneng bad ka jingjur ka lyer hynne ka step, ki nongtied ka Nagaland ki la shem jingeh ban ïalehkai bha ym kumba long hynnin ka sngi.
Kaba Meghalaya ka a bteng ïa ka inning kaba ar ha ki 78/6, hynrei ka ka lah ban bynrap tang 28 run hashwa ban kan ‘bowled out’ na ka bynta 106 run ha ki 31.5 over. U Nishanta Chakraborty, u la ioh ban khyrwit ïa ka shi spah run ha ka sien kaba nyngkong bad ha ka inning kaba ar u la la lah ban pyndep kum u nongtied uba khlem shah pynhap wiket bad kamai tied ïa ka shiteng spah run kaba 57.
Hynrei ka Meghalaya ka la lah ban tam da 221 run ha ka innings kaba nyngkong hadien ba ka la lah ban buh ïa ka thong da 295 run bad shah pynhap 10 wiket ha ka inning kaba nyngkong hashwa ba ka liang pyrshah kan kynjoh 74 run haba wan shimti ïa ka pali kaba ar.
Ha ka jingshisha ka Nagaland ka la pyni ïa ka mynsiem ïakhun ha ka inning kaba ar, hynrei kam shym la lah ban kamai bun na ka daw ka jingïalehkai bha ki nongkawang bol ka Meghalaya ha kaba u Manish Sharma u la khur 4/22 ha ki 10.5 over.
Kham hashwa u PM San-thosh, uba la khur 5/18 ha ka inning kaba nyngkong, u la lah ban pynkhyllem ïa ki lai ngut ki nongtied ka Nagaland da kaba khur 3/58 ha ki 13 over ha ka inning kaba ar bad kane ka la pynlong ïa u ban khur haduh 8/76.
Kiwei pat ki nongkawang bol kiba la lah ban pynhap wiket ki long u Badonnam Mylliemngap (1/21 ha ki 7 over) bad u Bipin Kumar Ray (1/17 ha ki 5 over).
Katba ki nongtied ka Nagaland ki kynthup ïa u Afzal uba la khyrwit ïa ka shiteng spah kaba 58 run lem bad u Sujal Prasad (32). U Afzal u la shah pynhap wiket noh ha u Bipin.
U nongtied uba khatduh eh u dei u Dip Borah, uba la lah ban khyrwit ïa ka bol shabar jong u tylli. Hynrei hadien u la shah pynkhyllem noh ha u Santhosh uba la lah ban khanglad ïa u.
Lyngba kane ka jingjop kaba san sien kynthih na ki san sien ïakhun, ka Meghalaya ka la wan ha ka kyrdan ba hakhlieh ha ka plate group ha kaba ka la khur 31 point.
Kane ka long ruh ka jingshah rem kaba nyngkong eh ïa ka Nagaland ha kane ka lympyng bad ka la wan ha ka kyrdan ba-ar bad kamai 25 point.
Kumta ka Meghalaya kan hap ban ap ïano kan ïakynduh ha ka jingïakhun semi final ka ban long ha ka nongbah Shillong naduh 11 tarik mynta u bnai.
