Shillong, Rymphang 06
Ka Telangana Football Association ka la ïoh ka jingmynjur na ka bynta ban pynlong ïa ka jingïalehkai jong ka FIFA World Cup (qualifiers round) hapdeng ka India bad ka Kuwait ka ban long ha ka 6 tarik u Jylliew mynta u snem ha Hyderabad, la pynpaw u Dr. K.T. Mahi, Chairman ka TFA ha ka sngi Ba-ar.
U Mahi bad u secretary ka TFA u G.P. Palguna ki la ïakynduh ïa u Myntri Rangbah ka Telangana u Revanth Reddy, uba long u rangïalehkai phutbol barim.
“Ka jubab kaba ngi ïoh na u Myntri Rangbah ka long kaba seisoh. U Palguna u la kyntu ban pynbiang ruh ïa ki lad jingïarap na ka bynta baroh ki synjuk ïalehkai bad ngi la ïohpdiang ïa ka jubab kaba pynhun ïa ka mynsiem jong ngi,” la ong u Dr. Mahi.
Ka sorkar jong katei ka Jylla ka la pynthikna hadien ka jingïalang hapdeng u Dr K.T. Mahi, u G.P. Palguna, u Shahnawaz Qasim IPS, OSD bad u Ajith Reddy.
Na ka liang u Dr Mahi u la pynpaw ka jingai khublei ïa u President ka ka All India Football Federation u Kalyan Chaubey uba la shaniah ha ka TFA na ka bynta katei ka jingïalehkai.
U Dr Mahi u la ong ba ka jingïalehkai na ka bynta ka World Cup (qualifier) kan dei ka sien kaba nyngkong ban ioh pynlong ha Telangana. “Ngi pynpaw ka jingai khublei ïa baroh kiba la don bynta pynurlong ïa kane ka jingangnud. Ka jingkyrshan lang bad ka jingïasnoh kti lang ha baroh ki liang ka la long ka jingjop ha ka jingïaid lynti,” la ong u Dr. Mahi.
