Shillong, Rymphang 06
U rangïalehkai shakhmat ka Inter Miami u Lionel Messi u la ïada ïalade hadien ba ki paidbah riew ïeit phutbol ki la kynshi da ka kyntien ‘boo’ ban pyrshah ïa ka Inter Miami namar u la duh ïalehkai ha ka jingïalehkai paralok ha Hong Kong.
Ha kane ka jingïakhun kaba la long ha ka sngi U Blei, ka Inter ka la jop ïa ka League XI da 4-1 kol hakhmat ki 40 hajar ngut ki paidbah, ha kaba utei u kapten ka Argentina u Messi u la shah pynshong ben na ka daw ka jingmyn -saw (hamstring).
Na ka liang ka sorkar Hong Kong ka la ong ba u Messi u dei ban ïalehkai kumba 45 minit.
“Nga kwah eh ban ïalehkai, khamtam ha kum kane ka jingïalehkai kaba ngi la wan najngai bad ki paid ki da kwah ban ïohi ïa ka jingïalehkai. Hynrei ha ka por ka bym poi pyrkhat ha ka phutbol ka ju wan jia. Ha kano kano ka jingïalehkai ki lah ban wan jia ha kba phim lah ban ïalehkai,” la pynpaw u Messi.
“Nga kyrmen ba ngin wanphai biang sha ka jingïalehkai bad ban ïalehkai ha Hong Kong.”
Ki paidbah nongkyrshan kiba la don kumba 38,323 ki la pyndap ïa ka Hong Kong Stadium bad ki la hap ban pynlut haduh HK$1,000 (£101) na ka bynta kawei ka tiket.
Ki paidbah ki la pyrta ba ki kwah ban ïohi ïa u Messi ha ka kylla miet hadien ba utei u rangïalehkai World Cup u la long uwei na kiba la shah shah pynshongben.
Hadien ba um shym la lah ban mih madan, na ka liang ki paidbah ki la dawa ban pynphai noh ïa ka bai tiket hadien ba u trai ka Inter u David Beckham un ai khublei ïa ki paidbah.
Na ka liang ka Major Sports Events Committee (MSEC) jong ka sorkar Hongkong ka la ong ba ka long ka por kaba pyndiaw ïa ki paidbah namar kim shym la ïohi ïa u Messi ba un ïalehkai watla ka la ai jingïarap haduh HK$16m (£1.5m) sha ki bor pynïaid ka Tatler Asia na ka bynta kane ka jingïalehkai.
Na ka liang Tatler Asia ka la ong ba kam shym la pan pisa da ka daw ba u Messi um shym la mih madan ban ïalehkai.
U Messi u la ïoh ban mih na ka jaka shong ban ïalehkai hynriew minit shwa ban kut ka jingïaleh-kai ha ka jingïalehkai kaba lah jong ka Miami ha Saudi Arabia ha ka sngi Palei jong ka taïew ba la lah, hynrei ka kum ka jingbishar bniah la lap ba u Messi u la mynsaw ka kjat.
Utei u rangïalehkai ba la 36 snem ka rta uba la khur haduh phra sien ïa ka khusnam Ballon d’Or, u ka ong ba u la nangïoh bor na ka jingmynsaw bad u lah ban ïalehkai pyrshah ïa ka lahduh ha Japan ka Vissel Kobe kaba long ha ka sngi Balang ha Tokyo.
“Ngam tip la ngan lah ne em ban ïalehkai, hynrei nga sngew ba nga nangïoh bor bad nga da kwah eh ban ïalehkai,” u la bynrap.
