Agartala, Rymphang:
U Myntri Rangbah jong ka Tripura u Manik Saha ha ka lah sngi U Blei u la pynlong ïa ka jingïalang bad u Myntri ka sorkar kmie uba dei khmih ïa ka tnat ki kam pohïing u Amit Shah bad u President jong ka seng BJP u J.P. Nadda ha New Delhi bad ki la ïakren ïa ki mat kiba ïadei bad ka ilekshon Lok Sabha bad kiba bun ki kam ba ïadei bad ka jylla, la ïathuh ka tyllong khubor kaba la wan na ka seng.
Kumba la ïathuh ka tyllong khubor na ka seng BJP la ong ba u Saha u la pynlong ki jingïakynduh bad u Shah bad u Nadda ha ka ïingdorbar kaba thymmai bad ïakren halor kiba bun ki mat ha kaba ïadei bad ka ilekshon Lok Sabha, bad kiwei pat ki bynta kiba ïadei bad ka Tripura bad ki kam ba ïadei bad ka seng ha ka jylla.
Hadien ka jingïakynduh, u Myntri Rangbah ha ka rynsan phah khubor ha ka X, u la ong: “Ngi la ïakren halor ki mat ba ïadei bad ki kam pynroi ha Tripura bad ïakren ruh ha kaba ïadei bad ka ilekshon Lok Sabha ka ban sa long ha une u snem 2024.” “Ngi la ïakren ha kaba ïadei bad ka ilekshon Lok Sabha 2024 bad ki mat ba ïadei bad ka seng ha ka jylla. Ka Tripura ka la kular ban pynphuh ïa ar tylli ki syntiew Lotus (ki ar tylli ki Lok Sabha konstitwensi) na ka bynta u Modi sa ha u 2024,” la ong u Saha hadien ka jingïakynduh bad u Nadda.
Ka Tripura ka don ar tylli ki Lok Sabha konstitwensi bad ka seng BJP ka la jop ha baroh ar tylli kine ki konstitwensi ha ka ilekshon Lok Sabha 2019.
