Jaywick, Rymphang:
Kawei ka tymmen ba la 68 snem na United Kingdom (UK), ha ka Sngi Saitjaiñ jong ka taiew ba la dep ka la shah dait ha 2 tylli ki ksew kiba la ju tip kum ki ‘XL Bully’ katba ka dang leit ban jngoh ia u khun ksiew ba 11 snem. Ha kane ka jingjia, katei ka tymmen ka la mynsaw bad khlad noh syndon hapoh ka iingsah jong ka ha Jaywick hajan ka Clacton-on-Sea jong ka Essex ha ka Sngi Saitjaiñ.
Ki pulit ka Essex ki la pyntip sha Hillman Avenue ha ka por kumba 4 baje jong katei ka jan miet Sngi Saitjaiñ halor ka jingmynsaw jur jong katei ka tymmen hapoh ka iingsah lade bad kitei ki heh pulit ki la iathuh ba la ngeit ba katei ka jingmynsaw jong katei ka tymmen ka dei na ka jingdait jong kitei ki 2 tylli ki ksew ‘XL Bully’ kiba don hapoh jong katei ka jaka ba ka leit ban jngoh ia u khun ksiew jongka.
Hynrei la ong ba tang hadien katto- katne por ba ki pulit ki la leit poi ha katei ka iingsah jongka, katei ka tymmen pat ka la khlad noh namar ka jingjur ki jingmynsaw bad kumjuh ruh namar ka rta jongka ka la noh bad ka met ka la tlot bad kumta kam lah shuh ban ialeh pyrshah ia kitei ki jingpang, jingshitom na katei ka jingmynsaw kaba la jur.
Haba iadei bad kane, ki pulit ki la siat pyniap noh syndon ia baroh 2 tylli kitei ki ksew kiba la ngeit bad ki long ki ksew dait briew lane ki ksew khleh biej bad ki pulit ki la kem noh ruh ia u trai jong kitei ki ksew uba la don kumba 39 snem ka rta namar ka jingbuh bad jing-ri jong u ia kitei ki mrad kiba long ka jingma ia ka jingim jong kiba iaid- ba ïeng bad kiba leit poi sha katei ka jaka.
La ong ba kitei ki jait ksew ‘XL Bully’ ki long ki jait ksew kiba mih hi na ki ‘American Bully’.
Ka khun jong katei ka tymmen ka la iathuh ba u trai jong kitei ki ksew, u la shu ieh beiñ ia ka kmie jongka bad kitei ki ksew watla katei ka tymmen ka ju ud bad ujor man ka por haba iadei bad ka jinglong ba shyrkhei jong kitei ki ksew.
Shuh shuh la iathuh ba ha katei ka jingjia, utei u khun ksiew jong katei ka tymmen, tang mar ia iohi ia katei ka tymmen ba ka shah dait ha kitei ki ksew, u la mareh bad pyrta briew ban wan iarap, ha kaba ki para marjan ki la ia mih bad rah da ki mohkhiew bad ki tiar ki tar katba ioh ban beh bad tied ia kitei ki ksew.
Kumta ruh na ka liang ka iing jong katei ka tymmen, ka la ai khublei ia baroh kito ki para marjan kiba la ia mih ban iarap bad iakhun shitom ban pyllait ia katei ka tymmen na kitei ki ksew ha katei ka jingjia watla katei ka tymmen kam shym lah shuh ban kyrda bad ka la khlad noh tang hadien kumba katto katne kynta.
Watla katta, la ong ba u trai jong kitei ki ksew u la ioh lait jamin noh ha ka Sngi Ba-ar bad u la pynksan ruh ba kitei ki ksew kim ju pynthud ne buh jingma ïano- ïano ruh hynrei katei ka jingjia ha katei ka sngi ka long kaba pyn kyndit bad pyn lyngngoh wat ia u- uba long u trai jongki ruh naba kim ju khie bhur kumtei baroh shi katta.
