Tehran, Rymphang:
Ka Iran ha ka Sngi Nyngkong ka la pynbna ba kan nym ailad ia ka US ba kan leh donbor hapoh u pud- u sam jongka bad khamtam haba iadei bad ki jingther bom jong ka US ha ki bynta khappud jong ka Iran.
U National Security Advisor jong ka White House ha ka Sngi U Blei u la ong ba ka United States kan pynhiar kput bad kan pynphai kylliang sha ki jaka ba don ki ktem jong ki lehnoh ka Iran hapoh Iraq bad Syria kumba kitei ki lehnoh ki pynthud ia ki jhad bad ki jaka treikam ba don ki shipai ka US.
Hynrei, haba la kylla pat la ka United States ka don jingthmu bad ka nud ne em ban leit hiar thma pyrshah ia ka Iran, u Jake u la ong ba ka US kam shym don jingthmu eiei haba iadei bad kata. Hynrei u la ong ba lada ka Iran ka kwah ban iakhun pyrshah bad markhmat ia ka US, ka US ruh ka kloi ban leh ia kaba donkam bad ka long ba la pynkhreh.
Kumjuh ruh na ka liang ka tnat kam bar ri jong ka Iran, u Nasser Kanani ha ka Sngi Nyngkong, u la ther kylla pat ia ka US bad ong ba ka Islamic Republic kam ju ailad ia kino- kino ki bor ba nabar ba kin leit ban leh donbor ne pyni bor hapoh u pud- u sam jongka.
Kumta, u Kanani u la pynshai ba ka Iran kan nym shu sngap ne shah ia ki ri ba marjan ba kin pyni bor hynrei kan ialeh katba lah la ka bor ban tehlakam ia kum kitei ki kam thombor khamtam kiba la hap hapoh u pud- u sam jongka.
Ha kajuh ka por ruh u la ong pat ba ka Iran kam kwah ban wanrah jingiathud ne jingiakynad bad kano- kano ruh ka ri la ka long ia ki jingeh kiba mih hapoh ne shabar jong ka Iran.
