New Delhi, Rymphang:
Ka National Investigation Agency (NIA) ka la mudui mukotduma pyrshah ïa lai ngut ki nong Myanmar ha kaba ïadei bad ka jingwan rung beaiñ bad ka jingdonkti ha ka kam khaïi briew kiba dei ki nongshong shnong jong kiwei pat ki ri, khamtam ki Rohingya sha India lyngba ka khappud India-Bangladesh.
“Kine kiba la shahkem ki dei kiba la tip kyrteng kum u Rabi Islam ba la tip ruh da ka kyrteng kum u Rabiul Islam, u Shafi Alam ba la tip ruh da ka kyrteng kum u Sofi Alom bad kum u Sayedul Islam, bad u Mohammad Usman, kine baroh ki dei ki nongshong shnong jong ka Maungdaw distrik kaba don ha Myanmar,” la ong u nongaiktien jong ka kynhun NIA.
Kumba la ïathuh ka kynhun NIA, la ong ba kine kiba la shahkem ki la shah pynshisha ba ki la rung beaiñ sha India, ha ryngkat ka jingdonkti ban khaïi briew, khlem ki kot ki sla kiba biang bad ki la donkti ruh ha ka ban pynrung tuh ïa kiba bun ki bar ri lyngba ki lynti kiba rieh bad ki lynti ki bym shym ithuh kiba don ha ki bynta khappud.
“Nalor ka jingdonkti ha ki kynhun ba ju khaïi briew bad wan rung beaiñ, kine kiba la shahkem ki la donkti ruh ban pynbiej ïa ki kynthei kiba dei ki Rohingya, kiba poi wir ha Bangladesh, ba kin wan sha India halor ki jingbuh jingkular jong ki ban pynïathoh bad ki shynrang Rohingya,” la ong shuh shuh u nongaiktien.
Ka kynhun NIA ka la ong ba kum kine ki kynthei ki la shu shah die bad shah pynbor ban ïathoh ha kiba bun ki bynta jong ki jylla kiba kynthup ha Uttar Pradesh, Rajasthan, Jammu & Kashmir, Telangana bad Haryana.
“Na ka jingtohkit jong ka kynhun NIA la lap ïa kiba bun ki sabut ha kaba ïadei bad ka jingpyndonkam thok ïa ki kot ki sla jong u Rabi Islam bad u Mohammad Usman ha kaba la ong ba ki la ïoh ruh ïa ki Aadhaar Cards da kaba shu leh thok. Kine baroh arngut ki la pyndonkam ïa kine ki Card na ka bynta ban ïoh ïa kiba bun ki SIM Card bad ban plie ruh ïa ki Bank Account, ha kaba ki la buhrieh ïa ka jinglong tynrai jong ki,” la ong shuh shuh u nongaiktien.
