Dhaka, Rymphang:
Ki bor pyniaid jong ka Bangladesh ha ka Lah Sngi U Blei ki la iathuh ba kumba 95 ngut ki bor pahara khappud jong ka Myanmar kiba la mynsaw ki la poi leit phet rieh sha Bangladesh hadien ka jingiakhun la bun sngi hapoh Myanmar pyrshah ia ki Junta.
La ong ba naduh ba ka Junta ka la ioh ban knieh biang ia ka bor synshar ha u snem 2021, katei ka kynhun shipai ka la kynduh shibun ki jingeh khamtam haba iadei bad ka jingiakhun bad kiwei pat ki kynhun ban iaknieh bor synshar ha katei ka ri.
Kumta la ong ba ha kine khyndiat sngi ba la leit la lah ban ïohsngew ia ka jingsawa ki ktang suloi na khappud jong ka Myanmar bad na ka phang Southeast jong ka Bangladesh. Kane ka la pynlong ruh ia palat shi million ngut ki nongshong shnong ba rit paid jong ki Muslim ha Bangladesh kiba shu im ha ki iing trep bad iing dara hadien ban phet na katei ka jing-iakynad ha ki snem 2017.
Nalor kata, ka khubor ka iathuh ruh ba ki don ki dkhot jong ka Border Guard Police (BGP) na Myanmar kiba leit phet ha ryngkat ki tiar siat bad kumba 15 ngut napdeng kitei ki dei kiba la don ia ki dak mong kuli hynrei kiba leit ban rung jubor sha Bangladesh hadien ba ki la shah rem ha katei ka jingiakhun.
