Shillong, Rymphang 06
Ka All India Football Federation (AIFF) ha ka sngi Ba-ar ka la pynbna ïa ki lympung ïalehkai hapoh ka ri na ka bynta ka aïom ïalehkai 2024-25 ha kaba yn sdang shwa da ka Durand Cup ha u Naitung mynta u snem.
Kane ka Synjuk ka la pynbna run na ka bynta ki lympung ïalehkai jong ki khynnah lane ka AIFF Youth Leagues na ka bynta ki kyrdan ïalehkai U-13, U-15 bad ka U-17.
Shuh shuh la pynbna ba ia ki lympung ïalehkai jong ka Indian Super League (ISL), I-League bad ka Super Cup yn pynlong ha kajuh ka por naduh ka aïom ka ban wan.
Ïa ka lympung ïalehkai Super Cup (ba la tip mynta kum ka Kalinga Super Cup) la pynlong ha ka por tlang hadien ba pynsangeh shipor ia ki lympung ïalehkai hapoh ka ri ia kaba la mynjur lang bad ka AFC Asian Cup 2023.
Shuh shuh ka pynbna ia ka lympung ïalehkai ki kynthei ba la tip kum ka Indian Women’s League (IWL) yn pynlong ha ki hynriew bnai ki ban wan na ka bynta ka aïom ïalehkai 2024-25.
Kat kum ka jingpyllait da ka AIFF la ong ba ïa ka Durand Cup 2024 yn sdang naduh 26 tarik u Naitung haduh 31 tarik u Nailar mynta u snem. Yn bud sa ka Super Cup ka ban sdang naduh 1 tarik u Risaw mynta u snem haduh 15 tarik u Jymmang jong u snem 2025. Ka lympung ïalehkai I-League kan sdang naduh 19 tarik u Risaw mynta u snem haduh 30 tarik u Ïaïong jong u snem 2025. Ka IWL kan sdang naduh 25 tarik uRisaw mynta u snem haduh 30 tarik u Ïaïong 2025. Katba ïa ka lympung ïalehkai ISL 2024-25 yn sa pynbna hadien.
