Washington, Rymphang:
Ki shipai jong ka US ha ka Sngi U Blei ki la ther bom biang sha Yemen haduh 5 tylli ki ‘namding ha katei ka sngi bad uwei u ‘namding u dei uba leit poi sha ryngkew, katba saw tylli pat ki dei kiba thew ia ki jhad jong ki lehnoh Houthi.
La ong ba kane ka long ka sien ba lai ia ka US ba kan ther ‘namding bad ther bom biang sha ki jaka treikam lane sha ki jhad jong ki lehnoh Houthi kiba ioh jingkyrshan na ka Iran.
Na ka liang ki lehnoh Houthi ruh ki la sdang ban ther bom ia ki jhad ka US bad UK sha Red Sea naduh u Naiwieng jong u snem 2023 ba la leit. Kane ka la pynbitar ia ka US bad UK ha kaba kine ki ri mynta kim ailad shuh ia kitei ki lehnoh bad ki la sdang ther ‘namding kylla sa ma ki pat sha ki jaka treikam bad ki ktem jong kitei ki lehnoh.
Katei ka jingleit thombor jong ki lehnoh Houthi ka la sdang ruh naduh ba ka Israel ka leit ban hiar thma ia ki lehnoh Hamas kiba don hapoh Gaza bad kumta na ka liang jong ki kynhun lehnoh bapher ki la dawa ia ka US ba ka dei ban ialeh kumno ban pynkut bad pynsangeh noh ia katei ka thma bad ym ba kan leit ai jingkyrshan ia ka Israel kumba ka long ha kane ka por mynta.
