Lucknow, Rymphang:
Lajan shi snem, u heh nongïalam jong ka seng Congress u Rahul Gandhi u la thmu ban pynlong ïa ka jingïalang paidbah ha Uttar Pradesh kum shi bynta jong ka Bharat Jodo Nyay Yatra, ka ban sdang rung ha Uttar Pradesh na Chandauli distrik ha ka 14 tarik, Rymphang. Kane ka seng ha ka taïew ba la leit ka la dep ban thung ïa u MP barim u PL Punia kum u Convenor jong ka Yatra ha Uttar Pradesh bad ïa u nongïalam jong ka Congress Legislature Party u Aradhna Mishra kum u Co-convenor. Ka tyllong khubor ka la ïathuh ba ïa ki lynti ïaid na ka bynta ka Yatra la dep ban jied bad pyntikna ban long ki jaka ba ïaid ka Yatra.
Kumba la pynbeit, la ong ba ka Yatra kan sa ïaid lyngba ki 20 tylli ki distrik jong ka Uttar Pradesh na Chandauli sha Agra bad kan sa rung ha Rajasthan na Agra hadien 11 sngi bad kan sa bteng ha kiba bun ki bynta jong ka jylla na ka bynta ba shaphang Mihngi bad Sepngi jong ka jylla.
Ha kaba ïadei bad kane, la ong ba katkum ba la rai halor ki bynta jong ka Yatra ha Uttar Pradesh la ong ba kan sdang na Chandauli, hadien kane kan rung ha Varanasi, Bhadohi, Prayagraj bad Pratapgarh ha ka bynta ba shaphang Mihngi jong ka Uttar Pradesh.
Hadien kane kan sa bteng sa sha Amethi bad Rae Bareli, hashwa ba kan poi ha Lucknow hadien kane sa sha Sitapur, Lakhimpurkhiri, Shahjahanpur, Bareilly, Rampur.
Ha ka bynta ba shaphang Sepngi jong ka Uttar Pradesh, kan bteng ha Moradabad, Sambhal, Amroha, Bulandshahar, Aligarh, Hathras bad Agra.
Kumba la ïathuh ka tyllong khubor, la ong ba ka Yatra kan sa ïaid ruh sha ki 13 tylli ki distrik kiba marjan ha kaba ki nongbud jong ka seng ha kine ki jaka kin sa ïasnohktilang hala ki distrik bad kine kin kynthup ïa kiba na Sonbhadra, Mirzapur, Kaushambi kiba don ha ka bynta ba shaphang Mihngi jong ka Uttar Pradesh hadien kane sa sha Chitrakoot bad Fatehpur, Unnao, Hardoi, Farukkhabad, Badaun, Kasganj, Etah, Firozabad bad Etawah kaba don ha ki bynta ba shaphang Sepngi.
