Shillong, Rymphang 07
Ka jingpynkhreh ïa ka lympung ïalehkai 4th Khelo India University Games ka dangïaid shakhmat ha ka nongbah Guwahati ka ban sdang naduh 19 haduh 29 tarik mynta u bnai.
Ha kane ka lympung yn wan ïashim bynta da ki nongïalehkai na ki 163 tylli ki skulbah bapher bapher kiba don ha kylleng jong ka ri ki ban ïakhun tyngeh pyrshah na ka bynta ban khur ïa ka jingjop. Haba kheiñ lang baroh ki don haduh 5000 ngut ki nongïalehkai lem bad ki official.
Ïa ka shap (logo) jong kane ka lympung bad u mascot ka ban pyni ïa ki jylla ka thaiñ shatei lamihngi ryngkat ka jingrwai na ka bynta kane ka lympung, yn pyllait ha ka 8 tarik ha ka jingïalang ka ban long ha Guwahati da u Myntri Rangbah Assam u Dr Himanta Biswa Sarma bad u Nisith Pramanik, uba long u Myntri khynnah na ka bynta ka Youth Affairs and Sports.
Ha kane ka lympung ki jingïalehkai ki kynthup ïa ka Athletics, Rugby, Basketball, Volleyball, Swimming, Badminton, Hockey, Fencing, Kabaddi, Football, Tennis, Mallakhamb, Judo, Table Tennis, Boxing, Shooting, Weightlifting, Wrestling bad ka Yogasana, katba ïa ka Archery yn pynlong ha ka nongbah Shillong kata ha SAI Training Centre.
Ka jingthmu jong ka Khelo India University Games kaba don bun tylli ki jingïalehkai bapher bapher ka long shi bynta ban kyntiew ïa ki jingïalehkai ha ki skulbah kiba don ha kylleng jong ka ri. Ka tnat Youth Affairs and Sports jong ka Sorkar Pdeng ka wanrah ïa kane ka lympung ka long ban plie lad ïa ki samla ba kin pyni ïa ki sap ïalehkai ba kyrpang jong ki khnang ba ki lah ban ïashim bynta ha ki lympung ïalehkai hapoh ka ri.
