U Myntri Rangbahduh, u Narendra Modi, haba ai jingkren ha Parliament ha kine ki sngi, u la kob ba ha ka ilekshon MP Lok Sabha ka ban wan, ka BJP marwei kan jop haduh 370 ngut ki MP katba ka kynhun National Democratic Alliance (NDA) kan jop 400 ngut ki MP. Ban ïoh ïalam ïa ka sorkar bathymmai, kano-kano ka seng ne kynhun ha Lok Sabha ka donkam palat 272 ngut ki MP. Ka BJP, la arsien kynthih, ka la jop palat 272 ngut ki MP tang marwei. Watla katta ruh, ka la khot lang ïa ki seng kiba don ha ka shatri jong ka NDA ban ïatreilang. Lada ka jingkob jong u Modi ka urlong shisha, kan dei ha ka sien kaba lai ba un ïalam ïa ka sorkar ha New Delhi bad kan long ka jingjop ka bakhraw ïa u shimet bad ïa ka seng BJP baroh kawei.
Ka jingïoh lyer bha jong ka BJP ka long hadien ba ka la jop ha ka ilekshon ha ka jylla Chhattisgarh, Madhya Pradesh bad Rajasthan katto katne bnai mynshwa, ka jingwanphai biang jong u Nitish Kumar, Myntri Rangbah ka Bihar, sha ka shatri jong ka NDA, bad ka jingbym ïaid beit ka jingpynkhreh jong ki seng kiba shong ha ka liang pyrshah ïa ka ilekshon. Wat khmih lynti ban jop pyrshah ïa ka BJP katba dang ïa pait ne tlot ne don hapdeng ka jingartatien bad jingbym shaniah. Ka BJP kaba mynta, kam dei shuh ka BJP ha ki snem jong u Atal Bihari Vajpayee. Kane ka BJP jong u Modi ka dei kaba don ïa ka jingpynkhreh na ka bynta ka ilekshon ha kano-kano ka khyllipmat. Lada shu peit kai, ngin shem ba kane ka BJP ka dei kaba shu kwah ban ïakhun ilekshon baroh shi snem khlem shongthait katba ki seng ha ka liang pyrshah ki dang duh lyer.
Katto katne bnai mynshwa, ngi shem ba ka jingïakhun ha ka ilekshon Lok Sabha kan long hapdeng ka kynhun synrop ka bathymmai ïa kaba yn tip kum ka I.N.D.I.A lane “Indian National Developmental Inclusive Alliance”, kaba don kumba 25 tylli ki seng hapoh jong ka, bad ka NDA ba la ïalam da ka BJP. Ka NDA ka la synshar naduh u snem 2014 watla ka BJP ka la rah ïa u nam tam da kaba ïoh bun ngut ki MP na kylleng ka Ri. Ka I.N.D.I.A ka thmu ban wan sha ka bor da kaba pynliem ïa kane ka kynhun ba ïalam da u Myntri Rangbahduh. La khmih lynti ba ka ilekshon ka ban wan kan kham itynnad ban ïa kaei kaba la jia ha kine kiwei pat ki snem ha kaba ka BJP ka la shu sar naphang kat shaba don lait noh sha ki bynta ba shathie bad ka thaiñ Shatei Lam Mihngi. Hynrei lada peit ïa ka jinglong jingman mynta, ka BJP bad ka NDA ki la nang thom shakhmat da ka jingkut jingmut kaba skhem ba kin jop beit ha kane ka sien katba ki liang pyrshah ki i don hapdeng ka jingartatien.
Kumba ka long mynta, ym I lah ban pynkhih shuh ïa ka BJP na ka jingsynshar watla ki don ki nongshong shnong kiba angnud ban ïoh mad ïa ka jingkylla bad ki kwah ba ka Congress kan wanphai biang sha ka bor. Ban jop pyrshah ïa ka BJP, ka kynhun I.N.D.I.A ka donkam ban ïakhun da kaba tyngeh bad kan hap long kaba stad ban ïasam ïa ki jaka ban ïakhun. Lada ka rukom ïa ai bhah ïa ki jaka ïakhun hapdeng jong kine ki seng ka long kaba biang, ka BJP ka lah ban don ha ka jingsyier, hynrei lada bakla, kan long kumba ai lyer ïa ka BJP. Ha kajuh ka por, ki seng kiba don ha ka kynhun I.N.D.I.A ki dei ban pynduh noh ïa ka jingïashrut para ma ki. Kum ka nuksa, ka Congress bad ka Trinamool Congress kim lah ban peit slem iwei ïa iwei pat ha jylla West Bengal. Hato kane kan ktah ne em ïa ka jingai bhah ïa ki konstitwensi ba kin ïakhun? Lada ki poi sha u pud ba kam don jingïabeit, ka jingïohnong kan long na ka bynta ka BJP. Kan shong ruh ha ka jingstad jong kane ka kynhun synrop ha kano ka rukom kan rah ïa ki mat ki jura hakhmat ki paidbah bad kaei ka lynti ban poi sha ki jingangnud kiba bun. Ban shu beiñ shu khoh tang ïa u Modi marwei kan ym lah satia ban wanrah jingjop ïa kane ka kynhun.
Ka por kam don shuh na ka bynta ki seng bad ki kyrtong kiba kwah ban ïakhun ïa ka ilekshon MP. Ka jingpynkhreh ka la nang ïaid. Kiba suki, kin shah ieh shadien. Na ka bynta ka BJP, ka dur bad ka shap ha kane ka ilekshon kan long beit ‘Narendra Modi’. Ha kiba bun ki jaka, ki nongshong shnong kin ym don jingtip than shaphang ki kyrtong BJP, hynrei kin shah pynkynmaw beit tang ïa ka kyrteng jong u ‘Narendra Modi’. Hynrei ki seng kiba don ha ka liang pyrshah, kin bun ki nongïalam bad ki kyrteng. Tangba ngim dei ban kheiñ kai ïa ka jingstad jong ki paidbah. Teng-teng ynda la kob palat, ki paidbah ki thait noh bad ki pyrshang ban ailad noh ïa kiwei. Ka por kan sa batai shai ïa kiei-kiei baroh.
