Guwahati, Rymphang:
U nongïalam jong ka BJP ha Assam u Manoj Kumar Bora haba ai jingkren u la batai shai ba ki kynrum-kynram bad ki jingïakynad kumba la sakhi, ki la kiew bha ha ka por ba synshar ka sorkar Congress naduh u snem 2004 haduh 2014 haba la ïanujor bad kane ka por ba synshar ka seng BJP ha Assam.
Ha ka por ba la don ka jingïalang bad ki nongthoh khubor kaba la long ha ka sngi Ba-ar, u Bora u la kynthoh jur ïa ka seng Congress ha kaba u la ong ba ha ka jingsynshar jong ka seng BJP ha Assam la ithuh shai ba ki jingïakynad ki la duna bha haba ïanujor bad ki por ba synshar ka seng Congress.
U la ban jur da kaba ong ba ka seng Congress ka la shu pynheh tang ka ktien ban kynthoh jur ïa ka sorkar BJP ha kine ki sngi ba mynta hynrei kumba la sakhi, la shem ba dei tang ka sorkar BJP kaba lah ban wanrah ki kam pynroi ha ka jylla bad khamtam ha kaba ïadei bad ka jinglah ban pynduna ïa ki jingjia jong ki jingïakynad ha ka jylla.
