Shillong, Rymphang 07
Wat la ka Sorkar Pdeng ka la dep ban mynjur na ka bynta ka skhim ban siang phlang plastik (Artificial turf) ïa ki hynriew tylli ki madan ïalehkai lem bad kawei ka Synthetic Athletic Track hapoh kane ka Jylla, hynrei kine baroh ki lah ban bijai noh na ka daw ka jingbymshim khia bad buddien da ki nongmihkhmat lem bad ki bor ba dei khmih.
Kat kum ka jingpynbna ha u snem 2022 la ong ba ki madan ïalehkai phutbol kiba la ïoh ka jingmynjur na ka Sorkar Pdeng ki long ka madan Kurkalang ha Bhoirymbong (Ri Bhoi District), ka madan Patarim ha Umsning, Ri Bhoi District, madan Wahlyngkhat ha Pynursla, madan Pyndeng-umïong ha Mairang, Eastern West Khasi Hills bad ka madan ïalehkai jong ka Rangdajied United Football Club ha Mawngap.
Ka Sohra kadei kaba la ïoh ka jingmynjur haduh ar tylli ki madan ïalehkai; kata ka madan phutbol ha Wahsari bad ka Synthetic Athletic Track ha Khliehshnong.
Lah ban pynkynmaw ba mar ïa sdang u snem 2022, ka tnat ïalehkai jong ka Sorkar Pdeng ka la dep ban phah ïa ki briew ba kin leit jurip ïa kitei baroh ki hynñiew tylli ki jaka ïalehkai la ki long ne em kiba shisha bad la pynthikna ba kitei ki madan ki long kiba dei hok ban ïoh.
Kat kum ki khubor la ong ba kitei ki hynñiew tylli ki projek la mang lyngba ka skhim Khelo India jong ka Sorkar Pdeng ha ka jinglut kaba mar T. 7 klur.
La ong ba ka Jylla ka la phah ïa ka jingtyrwa ban ïoh jingïarap na ka Sorkar Pdeng kumba 14 tylli ki jaka ïalehkai, hynrei ka la ïoh tang hynñiew tylli.
Wat la ïa kitei ki projek la dep ban mynjur naduh u snem 2022, hynrei haduh mynta ym shym la ïohi dak eiei ba ka Sorkar kan sdang ia ka jingtrei bad la sngewthuh ba ki lah ban duh noh na ka daw ba ki nongmihkhmat ne ki bor ba dei khmih kim shym la shim khia ban buddien ïa ki.
Lada ïa kine ki projek ym shym la lah ban pynurlong kan long ka jingduhnong kaba khraw bad khamtam eh ïa ki khynnah kiba don ia ki sap ïalehkai bad kumno kin lah ban pynpaw ïa ki sap ïalehkai ba kyrpang jong ki.
