New York, Rymphang:
Katkum ki khubor la ong ba uwei u rangbah 45 snem na United States, u la mait bad ot lyngkhot ia uwei pat u briew tang namar ka jingiakajia na ka daw u drok. Ha kane ka jingjia utei u rangbah u la mait ia ka khlieh jong uwei pat bad u la buhrieh hapoh ka ‘fridge’ kaba don hapoh ka iingsah jong u ha New York la kumba 2 snem mynta.
Ia utei u briew la ithuh kum u Nicholas McGee bad ia mynta hi u dang don hapoh ka jingtohkit jong ki pulit ka Virginia haba iadei bad katei ka kam runar bad kam pyniap briew jong u. Haba la tohkit bniah ia u, utei u rangbah u la iathuh ba u la dep leh ia katei ka kam naduh u Lber jong u snem 2022 bad u la phla ruh ba shuwa ba un pyniap ia utei uwei pat u runar uba la don kti ha ki kam batbor ha ki por ba la leit bad uba la ju tip kum u Kawsheen Gelzer, utei u briew u la kren bad ong ia u ba u dei hok ban iap bad um don hok shuh ban im ha kane ka pyrthei.
La ong ba utei u rangbah 45 snem u la phla lut ia kitei ki jingjia bad jingleh jong u baroh tang shisien tohkit da ki pulit hadien ba la lap ia katei ka kam runar jong u.
Shuh shuh ruh la ong ba u la leh ia katei ka kam pyniap briew ha ryngkat ka jingiadon lang jong ka kurim jong u- ka Heather Stines kaba la don 45 snem ka rta hi bad kaba la pynngat bad kynñiat ia u marwei ha katei ka kam pyniap bad ong ba u dei tang ma u hi uba dei ban shim jingkit khlieh namar kam shym la ïadon bynta eiei pat ha katei ka kam pyniap briew.
Ha u bnai ba la lah, ka Ms Stines haba iakren bad ki pulit, ka la iathuh ba u kurim jongka u leh hi marwei ia katei ka kam pyniap briew hadien ka jingiakajia jong u bad u Gelzer namar ki daw u droks. Ka Stines ka la iathuh ruh ba katei ka jingjia ka la jia ha ka 22 tarik u Lber jong u snem 2022. Hynrei ki pulit ki dang mutdur ba katei ka jingjia ka dang jia dang ha ki bnai Nailar ne Nailur jong une u snem 2023 ba la lah.
