Shillong, Rymphang 07
Ka kynhun ki ‘thei ïalehkai U-19 ka ri India kan pynkhreh ïa ka jingïakhun final jong ka lympung ïalehkai SAFF U19 Women’s Championship 2024 pyrshah ïa ka Bangladesh ha ka Sngi Palei ha BSSSMK Stadium kaba ha Dhaka.
Kane ka long ka sien kaba nyng-kong eh ïa kane ka kynhun ïalehkai ka ri ba kan rung sha ka final ha ka SAFF (South Asian Football Federation). Ha u snem ba la la dep jong ka SAFF U20 Women’s Championship kaba la long ha Dhaka, ka India ka la shah rem noh ha ka Bangladesh ha ka jingïakhun final.
Kane ka jingïakhun final kan long ka kabu ksiar ia ka India ba kan thaw ïa ka rekod bad khur ïa ka nam lahduh. Ha ki jingïalehkai group, ka India ka la lah ban pynliem ïa ka Bhutan da 10-0 kol bad ïa ka Nepal da 4-0 kol, hynrei ka la shah rem ha ka Bangladesh da 1-0 kol na ka bynta ban wan ha ka kyrdan ba-ar.
Watla ka la pynkhlaiñ ha ka bynta kaba shadieng bad ruh ha ka bynta kaba shapdeng, ka India ka la ïalekai bha ha ka bynta kaba shakhmat lyngba ka jingdon ïa ki ‘thei ïalehkai kiba kynsai kum ka Pooja bad ka Sulanjana Raul, katba ki ‘thei ïalehkai shapdeng ki long ka Neha bad ka Sibani Devi.
Hapdeng kane ka jingkhlaiñ, hynrei kan ym long kaba suk ban ïakhun pyrshah ïa ka Bangladesh kaba long ka kynhun kaba la ïoh ban pynlong ïa kane ka lympung.
“Ngam sngewhun ba ka India kan shah rem ha ka Bangladesh ha kine lai snem ba la leit, hynrei kane ka jingïalehkai final kan wanrah ka jingkylla. Nga thikna ba baroh ar ki kynhun kin ïalehkai bha, hynrei ka kynhun ka ban ïoh thep kol nyngkong kan rah ïa ka nam lahduh. Te kumta nga kyrmen ba ka kynhun kan lah ha ka ban thep kol,” la pynpaw ka coach ka kynhun ïalehkai ka ri ka Sukla Dutta hashwa ka jingïakhun final.
“Nga sngewthuh ba ka Bangla-desh kan ïoh ka jingkyrshan kab pura na ki paidbah riew ïeit phutbol, hynrei ngin pynleit jingmut na ka bynta ka jingïalehkai,” ka la bynrap.
Kumba ka India ka la ïakynduh teng ïa ka Bangladesh ha ka jingïalehkai group, te kumta ka Sukla ka tip bha kumno ba kan pynïalehkai ïa ka kynhun. “Ngin ïakhun pyrshah ïa katei ka kynhun na bynta ban rai ïa ka nam lahduh ha kane ka lympung, te kumta ngi tip kumno ban ïalehkai. Ym don jingartatien ba ka long ka kynhun kaba khlaiñ bor. Nga batai ïa ki ‘thei ïalehkai ba kin pynleit jingmut ïa ka jingïakhun khang ba kin lah ban ïalehkai bha na ka bynta ban kynjoh sha ka thong.”
Kane ka jingïalehkai kan sdang ha ka por 5:30 janmiet bad yn pyni paidbah ïa kane ka jingïalehkai ha ka Sportzworkz YouTube channel.
