Shillong, Rymphang 07
Ka Shillong Lajong FC kan ïakhun pyrshah ïa ka kynhun ïalehkai Indian Super League, ka North East United FC ha ka U-17 Youth League ba la pynïaid da ka All India Football Federation ha ka Sngi Palei ha kane ka nongbah.
Kane ka kynhun ïalehkai na ka nongbah ka la mad ïa ka jingshah rem ha ka Football 4 Change Academy kaba na Manipur da 0-1 kol ha madan ïalehkai phutbol jong ka MFA kaba ha Polo. Ïa kane ka shi kol la thep da u Janggunhao Khongsai ha ka minit kaba 81.
Kane ka long ka sien kaba lai ïa ka Lajong ban mad ïa ka jingshah rem ha kane ka lympung bad kham hashwa ka la shah rem da 1-0 ha ka Harisinga Town Club bad ruh ha ka Aizawl FC.
Kumba ka long mynta ka Lajong ka la don ha ka kyrdan basaw na ki san sien ïakhun jong ka Group-C bad kamai 5 point.
