Shillong, Rymphang 07
Ka Jordan ka la pynliem noh ïa ka South Korea da 2-0 kol na ka bynta ban jam sha ka final ha ka sien kaba nyngkong eh ha ka lympung ïalehkai jong ka Asian Cup ha ka sngi Ba-ar ha Ahmed bin Ali Stadium.
Kane ka nam jop ka la wan urlong lyngba ki kol u Yazan al-Naimat bad u Musa al-Taamari.
Kane ka jingjop ka la pynshaïong ïa ka pyrthei hi baroh kawei namar ka Jordan kaba don ha ka kyrdan ba 87 ha ka pyrthei ka la lah ban pynliem ïa ka South Korea kaba long ka kynhun kaba kynsai tam ha ka dewbah Asia bad kaba tam haduh 64 kyrdan ïa ka.
U Naimat uba la ïoh ban thep ïa ka kol ban pynïakhaid da mar 2-2 kol ha kaba kine ki kynhun ki la ïakynduh teng ha ka jingïalehkai jong ka group stage bad sa shisien une u rangïalehkai ba dang 24 snem ka rta u la lah ban thep kol biang da ka jingnang jong u ban pynshad ïa ka bol.
Hadien ka jingbym lah ban thep kol ha ka kylla step, u Naimat u la lah ban pynpaw ïa ka jingtbit na ka bynta ban pynkhih jar ïa ka Jordan hadien ba u la lah ban pynpra ïa ki lai ngut ki rangïalehkai ‘dien hapoh ‘box’ bad wat u rangapkol um shym la lah ban khanglad na ka jingshah thep ha ka minit kaba 53.
Hadien katto katne por ka Jordan ka la pynbud biang ïa ka kol kaba ar lyngba u Taamari ha ka minit kaba 66.
Hashwa ban wai u Lee Jae-sung u la jan ioh thep kol na ka bynta ka South Korea hadien ba u Son Heung-min u la ïarap ban pynbud bol, hynrei ka jingïoh ban pyndei da ka khlieh ïa ka bol da utei u rangïalehkai shapdeng kam shym la urlong bad ka la duh ei ïa kane ka kabu ksiar.
