Dubai, Rymphang:
Katkum ki khubor laong ba kawei ka jhad ‘Cargo’ jong ka UK ka la julor na ka jingther bom jong ki lehnoh na Yemen ha ka Sngi Ba-ar bad kane ka long hadien ba ki kam thombor jong ki lehnoh Houthi bad ki lehnoh na Yemen ka la jur bha ha katei ka duriaw Red Sea.
Kumta, la ong ba katei ka jhad ka la julor na ki bynta ba sharud jongka ha katei ka jingshah thombor ha West Hodeida.
La ong ba ki lehnoh Houthi kiba ioh jingkyrshan na ka Iran bad kiba ju don ha Yemen, ki ju pyni bor bha ha katei ka bynta jong ka duriaw Red Sea ha kine ki sngi mynta bad kane ka la sdang mynta la kumba katto- katne bnai hadien ba ka Israel ka la leit hiar thma bad kput ia ka kynhun lehnoh Hamas kaba synshar hi ia ka nongbah Gaza jong ka Palestine.
Kumta, kane ka jingleh jong kitei ki lehnoh Houthi ka la nang pyn bitar shuh shuh pat ruh ia ka United States bad ka United Kingdom (UK) bad ka la wanrah ia ka jingïather bom ba markylliang na kawei ka sngi sha kawei pat bad la ong ruh ba ka don ka jingma haba iadei bad katei ka jingiakynad bad jing ia pyni bor jongki namar ka lah ban wanrah wat ia ka thma kaba jur hapdeng kitei ki ri bad ki ri Muslim.
