Washington, Rymphang:
Ha kane ka khubor la ong ba uwei u khynnah 13 snem na United States u la siat iap ia la u jong u kpa-ieid hadien ka jingiania namar ka jingkah jong ka kjat jong uwei u briew hapoh ka bos ba utei u khynnah rit u shong.
Ia utei u tymmen la ithuh kum u Richard Sanchez bad u la don 60 snem ka rta. Kane ka la jia ha kane ka taiew ba la dep katba u dang don ha katei ka bos jong ka Regional Transportation District (RTD) lyngba jong ka Denber, Colorado.
Ia mynta hi, ki pulit kim pat shym la pynpaw kyrteng ia utei u khynnah bad la ong ba utei u khynnah hadien ka jing-iania bad utei u paieid, kynsan u la sei ia ka suloi na ka pla lade bad u la siat beit-beit ia utei u tymmen khlem da don ba iohlad ban bat ne pynsangeh ia katei ka jingthmu jong u.
Tang mar kumta hi la ong ba ki paidbah kiba ïadon ha katei ka bos ki la ialeh ban pynkit noh kloi ia utei u tymmen sha ka jaka sumar hynrei ki bor pyniaid hospital ki la pynbna ba u la iap shwa ban poi ha jaka sumar.
Ha katei ka jingjia la don ruh sa uwei pat uba mynsaw lang hynrei u bym shym la rah sha jaka sumar namar ka dei tang ka jingmynsaw kaba malu-mala. Hynrei na ka liang ki bahaiing- bahasem jong utei u tymmen, ki la iathuh ba kim shym la bna eiei shaphang ka jingïap jong utei u tymmen, dei tad haduh ba kin da leit ban ujor sha ki pulit halor ka jing jah rngai jong u naduh katei ka taiew ba la leit.
La ong ba ki bahaïing baroh ki dap da ka jingsngewsih bad ki sah ha ka jingdum namar kim lah ban sngewthuh ia katei ka jingjia namar utei u tymmen u long u briew u bym ju iakajia badno- badno ruh namar baroh ki ia-ieid bad sngewtynnah lut ia u.
Hynrei katei ka jingjia ka la pyn kyndit bad pynsah lyngngoh ia ki baroh ha kane ka por bad ia ka daw jong katei ka jingjia ruh kim sngew lah ban mutdur ba kan pynpoi shaduh utei u pud jong ka jingïap.
