Agartala, Rymphang:
Ki shipai ka tnat BSF ki la kem noh ïa kumba 23 ngut ki nong Bangladesh kiba dei ki nongkhaïi beaiñ katba ki dang pyrshang ban leit khaïi tuh ïa ka shini kaba 6,250 kilo na India sha ka ri jong ki, la ïathuh ki heh pulit.
Ki pulit ki la ïathuh shuh shuh da kaba ong ba hadien ba la ïoh jingtip halor kane ka jingdon jong kiba khaïi tuh ïa ka shini, ka kynhun ba la pynkhlaiñ bha jong ka tnat BSF ka la pynlong ïa ka jingkerkut ha ka thaiñ Samarganj kaba hap hapoh South Tripura distrik bad kem ruh ïa ki nongkhaïi tuh kiba dei ki nong Bangladesh hadien ba ki la leit ban ïaid lyngba ka International Boundary ban leit shim ïa kine ki song jong ka shini na ki jaka ba la buh kaba don ha ka liang jong ka ri India.
Ki heh pulit, ki la ong ba ki la don kumba 125 tylli ki song ba buh shini kiba don ka jingkhia da 6,250 kilo ïa kiba la ïoh ban kurup na ki thaiñ bad 17 tylli ki Mobile Phone na ka jingkhmih bniah na kine ki nongkhaïi mar tuh kiba dei ki nong Bangladesh.
Na ki 23 ngut ki nong Bangladesh, 22 ngut ki dei kiba na ka thaiñ khappud jong ka Feni distrik (Bangladesh) bad uwei pat u dei na Chattogram distrik.
Ki heh shipai jong ka tnat BSF, mar mar khlem da pynslem hadien ka jingïohkem ïa kine ki nongkhaïi mar tuh, ki la pyrshang ban ïakren bad ki shipai ka tnat Border Guards Bangladesh na ka bynta ban shong jingïalang. Ïa kine ki nong Bangladesh kiba la shahkem la aiti sha ki pulit jong ka Tripura hadien ba la dep ban khmih bniah ïa ka jinglong ka koit ka khiah jong ki. Ki heh shipai BSF ki la ong ba kumba la sakhi, la ong ba ka jingkhaïi tuh ïa ka shini ha ki bynta khappud jong ka India bad Bangladesh ha Tripura ka la jur bha ha kine ki snem ba dang shen.
Ha u snem 2023, da kumba 5.50 lak kilo ka shini ha ryngkat 16 ngut ki nongkhaïi tuh bad 27 tylli ki kali la ïoh ban kem bad kurup da ki BSF. Da palat 2.11 lak kilo ka shini ha ryngkat 34 ngut ki nongkhaïi tuh bad ryngkat ki 14 tylli ki kali, la ïoh ban kem bad kurup da ki shipai BSF haduh mynta ha une u snem.
