Guwahati, Rymphang:
Ki shipai jong ka tnat Assam Rifles ki la lah ban pynpulom ïa ki jingthmu ba bun ha kaba ïadei bad ka jingkhaïi tuh ïa u kwai tyrkhong bad ïoh ban kurup da kumba 4428.314 tonnes ki song jong une u jait kwai kiba shongdor kumba T. 156 klur ha ki ïew bar ri, hapdeng u Kyllalyngkot bad u Nohprah jong u snem 2023, ha ki lai tylli ki jylla kiba don ha ka bynta ba shaphang Shatei-lam-Mihngi. Ki shipai Assam Rifles ki la ïoh ban kurup ïa kine ki kwai na Manipur, Nagaland bad Mizoram katba dang thmu ban shalan ïa ki song jong u kwai sha India na Myanmar.
Ka jingïoh kurup kaba pynlyngngoh ha kaba ïadei bad ka jingdon kaba 2712.704 tonnes u kwai tyrkhong ba la khaïi beaiñ, ha kaba la antad ba u la kot sha ka T. 95 klur ha Manipur, 1032.96 tonnes, ïa kaba la antad ba u la kot sha ka T. 37 klur, ha Nagaland, bad 682.65 tonnes, uba la kot sha ka T. 24 klur ha Mizoram, ka dei da ki shipai Assam Rifles ha u snem 2023. Ka kynhun jong ki shipai ka sorkar kmie ba la tip kum ka “The Sentinel of the Northeast,” ruh ka la ïoh ban kem ïa kiba bun ki nongkhaïi tuh kiba la donkti ha ka jingkhaïi beaiñ bad ïoh ban kurup ïa bun tylli ki kali, kiba don ïa ki Registration Numbers na India bad Myanmar ha u snem ba la lah.
